AQSH prezidenti Donald Tramp va uning maxsus vakili Stiv Uitkoff Rossiyaning Eronga ko'rsatayotgan go'yoki yordami masalasiga to'xtalib o'tdi. Gap shundaki, avvalroq The Washington Post nashri Rossiya Eron tomoniga AQSHning Yaqin Sharqdagi harbiy obyektlari haqida maxfiy ma'lumotlarni uzatayotgani haqida xabar tarqatgan edi. Ushbu ma'lumotlarga ko'ra, Rossiya tomonidan taqdim etilgan aniq koordinatalar Eronning hujumlar samaradorligini oshirishga xizmat qilayotgan bo'lishi mumkin.
Prezident Tramp jurnalistlar bilan suhbatda bu xabarlarga ehtiyotkorlik bilan yondashdi. U Rossiya haqiqatan ham Eronga yordam berayotganini aniq bilmasligini, biroq bu yordam bo'lsa ham, Eronning harbiy holatini sezilarli darajada yaxshilamaganini ta'kidladi. Trampning so'zlariga ko'ra, AQSH Eronning harbiy salohiyatini allaqachon jiddiy darajada zaiflashtirgan va Rossiyaning har qanday harakati ham vaziyatni o'zgartira olmaydi.
Stiv Uitkoff esa Rossiyadan AQSH harbiy obyektlari haqidagi ma'lumotlarni Eronga taqdim etmaslikni qat'iy so'radi. Ekspertlar Eronning so'nggi paytlarda amalga oshirgan zarbalari juda aniq va maqsadli ekanligini qayd etishmoqda. Ularning fikricha, Eron qo'mondonlik markazlari va nazorat tizimlarini yo'q qilishda avvalgiga qaraganda ancha samaraliroq harakat qilmoqda. AQSH Mudofaa vazirligi esa ushbu vaziyat yuzasidan hozircha rasmiy izoh berishdan saqlanib qolmoqda.
“Zamin”ni Telegramʻda oʻqing!
