AQSH Yaqin Sharqdagi harbiy faolligini yanada kuchaytirishi mumkin. The Wall Street Journal nashri manbalariga tayanib xabar berishicha, AQSH harbiy-dengiz kuchlariga qarashli USS Tripoli desant kemasi bir qator boshqa harbiy kemalar hamrohligida Fors ko‘rfazi tomon yo‘l olgan.
Ma’lum qilinishicha, ushbu harbiy guruh hududga taxminan 5–7 kun ichida yetib borishi kutilmoqda. Bu esa mintaqadagi vaziyat yanada keskinlashishi mumkinligidan dalolat beradi.
Nashr ta’kidlashicha, “USS Tripoli” bortida kuchli aviatsiya guruhi joylashgan bo‘lib, 2 mingdan ortiq dengiz piyodalari xizmat qilmoqda. Bu kabi desant kemalari odatda tezkor javob berish va quruqlikdagi operatsiyalarni qo‘llab-quvvatlash uchun ishlatiladi.
Bundan tashqari, AQSH qo‘mondonligi Yaqin Sharqqa dengiz piyodalarining ikkinchi ekspeditsion guruhini ham yuborishni rejalashtirmoqda. Bu qadam Vashingtonning ehtimoliy harbiy ssenariylarga jiddiy tayyorgarlik ko‘rayotganini ko‘rsatadi.
Mutaxassislar fikricha, bunday harakatlar AQSHning mintaqadagi strategik manfaatlarini himoya qilish, shuningdek, ehtimoliy tahdidlarga qarshi tezkor chora ko‘rish maqsadida amalga oshirilmoqda. Shu bilan birga, bu kabi harbiy kuchlarni joylashtirish diplomatik bosim vositasi sifatida ham baholanmoqda.
Hozircha rasmiylar tomonidan to‘liq miqyosli quruqlik operatsiyasi boshlanishi haqida aniq bayonot berilmagan. Biroq kuzatuvchilar ushbu harakatlar kelgusidagi ehtimoliy harbiy qadamlar uchun zamin yaratayotganini istisno etmayapti.
“Zamin”ni Telegramʻda oʻqing!
