Muzqaymoq ta’mli banan: ko‘k rangli noyob meva haqida ajoyib ma’lumot!

Oddiy banandan farqli o‘laroq, Blue Java Banana o‘zining kumushrang-ko‘k po‘stlog‘i va g‘ayrioddiy ta’mi bilan e’tibor tortadi. Eng qizig‘i, bu mevaning ta’mi ko‘pchilikka vanilli muzqaymoqni eslatadi. Shu sababli u “Muzqaymoq banan” nomi bilan ham mashhur.

Blue Java Banana — Musa acuminata va Musa balbisiana turlarining gibridi. Pishmagan paytida po‘stlog‘i o‘ziga xos kumushrang-ko‘k tusga ega bo‘ladi.

Meva pishib yetilgach esa uning rangi asta-sekin sarg‘ayadi.

Bu bananning eng katta qiziqishi faqat tashqi ko‘rinishida emas. Uning ichi oddiy bananga qaraganda yumshoqroq va kremliroq bo‘ladi.

Yengil vanil aromati va shirin ta’mi sabab ko‘pchilik uni muzqaymoqqa o‘xshatadi.

Shu xususiyati tufayli Blue Java Banana ayniqsa sut mahsulotlarini iste’mol qilmaydiganlar orasida qiziqish uyg‘otgan. Blue Java Banana tropik hududlarda, jumladan Gavayi, Filippin, Fiji va Markaziy Amerikaning ayrim mintaqalarida yetishtiriladi.

U boshqa banan navlariga qaraganda sovuqqa chidamliroq bo‘lib, turli iqlim sharoitlariga moslasha olishi bilan ham ajralib turadi.