Baliqchilar Gurbanguli Berdimuhamedovni baliqsho‘rva bilan mehmon qildi va qo‘shiq kuylab berdi (video)

^{Foto: «Xronika Turkmenistana»}
Turkmaniston prezidenti Gurbanguli Berdimuhamedov 13 yanvar kuni Bolqon viloyatiga tashrif buyurib, neft-gaz konini ko‘zdan kechirdi, deb xabar beradi «Xronika Turkmenistana».

Ma’lum qilinishicha, shundan so‘ng Berdimuhamedov Kaspiy hududidagi baliqchilik zonasiga borgan va Gogerendag Esenguliy qishlog‘ida yashovchi baliqchilar bilan uchrashgan. Baliqchilar prezidentga o‘zlarining baxtli hayoti haqida so‘zlab berib, mahalliy tijorat baliqlarining turlarini, jumladan, quritilgan baliqlarni namoyish etgan.

^{Foto: «Xronika Turkmenistana»}
Davlat rahbarini kutib olgan baliqchi 10 yildan buyon baliqchilik bilan shug‘ullanishi va buni otasidan o‘rganganini so‘zlab bergan. Shundan so‘ng ularga boshqa baliqchilar ham kelib qo‘shilib, «prezidentning tashrifidan benihoya quvonganini bildirgan».

Prezidentning dengizga chiqish chastotasi va olinadigan daromad haqida savollariga baliqchilar o‘z kasbidan mamnun ekanini aytib, oyiga 10-12 marta dengizga chiqishlarini va 40-50 kilogramm baliq tutishlarini bildirgan — bu oilani boqish va sotish uchun yetarli.

Shundan so‘ng baliqchilar davlat rahbarini baliqdan tayyorlangan taom bilan mehmon qilgan hamda Berdimuhamedovga bag‘ishlangan milliy qo‘shiqni kuylab bergan.
“Zamin” yangiliklarini “Youtube”da kuzatib boring