«Asosiy motivatsiyamiz – tirik qolish» — Zelenskiy Evroparlamentda nutq soʻzladi

^{Foto: Yves Herman / Reuters / Scanpix / LETA}
Ukraina prezidenti Vladimir Zelenskiy Evroparlament yigʻilishida onlayn qatnashib, nutq soʻzladi. Oldinroq Ukraina Evropa Ittifoqiga qabul qilinishini soʻrab ariza kiritgandi.

«Qadrli doʻstlar. Oxirgi kunlarda qanday salomlashishni ham unutib qoʻydim. Kimgadir xayrli kun, xayrli tong deb ayta olmayapman, chunki har kun biz uchun yomon kun boʻlmoqda, ba'zilar uchun esa oxirgi kun.

Bugun oʻz vatani va ozodligini himoya qilayotgan ukrainaliklar nomidan gapiryapman. Bu erda gapirilayotgan gaplar meni chin dildan xursand qilyapti. Bu atmosferani yolgʻiz oʻtirib his qilyapman. Sizlarni bir erda toʻplay olganimizdan xursandman, ammo bu uchun shunchalik katta tovon toʻlashimizni tasavvur ham qilmagandim.

Hozir ukrain xalqi katta fojiani boshidan oʻtkazmoqda. Urush vaqtida ham, inqilob vaqtida ham, Rossiya bosqinining besh kunida ham minglab odamlar jon berishdi. Qoʻlimda oldindan tayyorlab qoʻyilgan nutq ham yoʻq, chunki biz nutq yozadigan ahvolda emasmiz. Bugun biz uchun eng katta haqiqat shuki, har kuni odamlar oʻlmoqda. Bu insonlar erkinlik uchun, inson huquqlari uchun, bugun siz bemalol foydalanadigan huquqlarga ega boʻlish uchun jon berishmoqda. Eng yaxshi fuqarolarimiz oʻlishdi.

Ukrainaliklar fantastik odamlar. Biz boshqalardan ilgarilab ketishimiz va barcha qiyinchiliklardan chiqib keta olishimiz haqida koʻp gapiramiz. Va buni barchangiz oʻz koʻzingiz bilan koʻryapsiz. Ishonaman, biz buni uddalaymiz. Ukrainaliklar Evropa yoʻlini tanlashdi, biz bugun mana shu tanlov uchun turib beryapmiz. Ukrainaning Evropa tanlovi sizning ham tanlovingiz ekanini oʻz ogʻzingizdan eshitmoqchiman.

Siz bilan aloqamiz ba'zida uzilib qolishi mumkin, chunki bizga qarata koʻplab raketalar otilmoqda. Ayniqsa Rossiya chegarasiga yaqin boʻlgan Xarkov shahrida. U erda juda koʻp ruslar yashaydi va doim munosabatlarimiz yaxshi boʻlgan. Xarkov universitetlari eng koʻp shahar, xarkovlik yoshlar juda aqlli. Xarkovdagi Ozodlik maydoni Evropadagi eng katta maydon hisoblanadi. Tasavvur qilyapsizmi, bugun ertalab oʻsha erda ikkita raketa tashlandi, oʻnlab odamlar oʻldi. Ozodlik uchun mana shunday qimmat tovon toʻlayapmiz.

Bugun bizning chegaralarimiz yopilgan, hech kim bizning ozodligimiz uchun kurashgani Ukrainaga kira olmaydi. Endi mamlakatimizning har bir qarichi biz uchun Ozodlik maydonidir.

Biz oʻz bolalarimizni tirik koʻrishni istaymiz, ammo bugun 7 nafar bolamiz oʻldirildi. Prezident Putin bu shunchaki harbiy operatsiya ekani, maqsad faqat harbiy ob'ektlar ekanini aytishdan charchamayapti, lekin aslida bunday emas. Bu «harbiy operatsiya»da odamlar oʻlmoqda, kecha 16 bola oʻldirilgandi.

Xalqimiz birdam. Biz oʻz huquqlarimiz, erkimiz va tirik qolish uchun kurashyapmiz. Aynan tirik qolish bizning asosiy motivatsiyamiz. Shuningdek, Evropa davlatlari kabi huquqlarga ega boʻlish uchun kurashyapmiz. Buni isbotlab boʻldik.

Ishoning, Evropa Ittifoqi biz bilan faqat kuchli boʻladi. Sizsiz Ukraina yolgʻizlanib qoladi. Biz oʻz kuchimizni, siz bilan bir qatorda ekanimizni koʻrsatdik. Siz ham biz bilan ekaningizni, yonimizda turishingizni koʻrsating, haqiqiy evropalik ekaningizni isbotlang. Shundagina hayot oʻlimdan, yorugʻlik zulmatdan ustun keladi. Yashasin Ukraina», dedi Zelenskiy.

Ukraina prezidentining nutqini qatnashchilar gulduros qarsaklar bilan qarshi olishdi. Qizigʻi, oldinroq Rossiya tashqi ishlar vaziri Sergey Lavrov BMT inson huquqlari boʻyicha yigʻilishda onlayn nutq soʻzladi. Uning chiqishi boshlanishi bilan esa koʻplab ishtirokchilar namoyishkorona zaldan chiqib ketishdi.

24 fevral kuni Rossiya armiyasi Ukraina hududiga bostirib kirdi. Putin bu «harbiy operatsiya» ekani va undan maqsad Ukrainani «millatchi»lardan tozalab, harbiy imkoniyatini yoʻqqa chiqarishligini aytgan. “Zamin” yangiliklarini “Telegram”da kuzatib boring