Prezident Shavkat Mirziyoyevning taʼkidlashicha, mamlakatning hozirgi salohiyati, amalga oshirilayotgan islohotlar, tadbirkorlarning faolligi va xorijiy hamkorlikning kengayishi hisobiga Oʻzbekiston 2026-yilga kelib yalpi ichki mahsulot hajmini 160 milliard dollarga yetkazishi mumkin. Bu haqda Podrobno.uz xabar beradi.
"Koʻrib turibsizki, mavjud resurs va imkoniyatlardan samarali foydalanilsa, mamlakatimiz katta yutuqlarga erisha oladi", — dedi davlat rahbari. Prezidentning qayd etishicha, zamonaviy global iqtisodiyotda raqobatbardoshlikni taʼminlashda malakali mutaxassislar va ilgʻor texnologiyalar hal qiluvchi ahamiyatga ega.
Shuningdek, yuqori qoʻshilgan qiymatga ega sohalarni rivojlantirish, yuqori daromadli xizmatlar sonini koʻpaytirish, bioinjiniring, ilgʻor agrotexnik va suvni tejovchi usullarni faol qoʻllash, "yashil" energetika va chiqindisiz ishlab chiqarishni joriy etish, shuningdek, taʼlim va sogʻliqni saqlash sohalariga ilgʻor xorijiy tajribani integratsiya qilish iqtisodiyotning barqaror oʻsishi uchun mustahkam asos yaratadi. "Agar biz kadrlarni ilm-fan va innovatsiyalarga asoslangan zamonaviy kasblarga tayyorlasak, yaqin besh yil ichida iqtisodiyot hajmini 240 milliard dollarga yetkazish uchun barcha imkoniyatlar mavjud", — deya qoʻshimcha qildi prezident.
Mehmon guruhidagi foydalanuvchilar ushbu nashrga izoh qoldira olmaydi.
