Adliya vazirligi tomonidan kapital bozorida yangi moliyaviy instrumentlarni joriy etishga qaratilgan muhim hujjat davlat roʻyxatidan oʻtkazildi. Gap chet el valyutasida ifodalangan obligatsiyalarni chiqarish va joylashtirish tartibini belgilab beruvchi meʼyoriy hujjat haqida bormoqda. U «Tartibga solish qumdoni» maxsus huquqiy rejimi doirasida qabul qilindi.
Mazkur hujjatga muvofiq, valyuta obligatsiyalari — nominal qiymati va daromadi xorijiy valyutada belgilanadigan emissiyaviy qimmatli qogʻoz hisoblanadi. Ushbu instrument obligatsiya egasiga belgilangan muddatda asosiy mablagʻni va emissiya risolasida koʻrsatilgan daromadni olish huquqini beradi.
Qoidalarga koʻra, bunday obligatsiyalarni faqat Oʻzbekiston rezidenti boʻlgan va «Tartibga solish qumdoni» ishtirokchisi maqomiga ega yuridik shaxslar chiqara oladi. Bunda ular mustaqil auditorlik tashkiloti tomonidan tasdiqlangan ijobiy yillik moliyaviy hisobotga ega boʻlishi shart.
Shuningdek, bir emitent tomonidan chiqariladigan valyuta obligatsiyalarining umumiy hajmi 50 million AQSH dollari ekvivalentidan oshmasligi belgilab qoʻyilgan. Bu cheklov bozordagi barqarorlik va xavflarni kamaytirishga qaratilgan.
Hujjatda obligatsiyalar taʼminlangan yoki taʼminlanmagan holda chiqarilishi mumkinligi ham koʻrsatilgan. Biroq, taʼminotsiz obligatsiyalar faqat emitentning oʻz kapitali miqdori doirasida chiqarilishiga ruxsat beriladi. Agar bu chegaradan oshsa, ortiqcha summa uchun albatta qoʻshimcha taʼminot taqdim etilishi talab etiladi.
Valyuta obligatsiyalarini chiqarish, joylashtirish, muomalaga kiritish, shuningdek ular boʻyicha daromadlarni toʻlash va soʻndirish jarayonlari ustidan nazorat Istiqbolli loyihalar milliy agentligi tomonidan amalga oshiriladi.
Mutaxassislar fikricha, mazkur qadam Oʻzbekiston kapital bozorini diversifikatsiya qilish, xorijiy investitsiyalarni jalb etish va moliyaviy instrumentlar turini kengaytirish yoʻlida muhim bosqich boʻladi.
