Tokio birjasida ro‘yxatdan o‘tgan Metaplanet kompaniyasi 2026-yilning birinchi choragi uchun moliyaviy hisobotini e’lon qildi. Unga ko‘ra, kompaniya operatsion daromadi 2,27 milliard yapon iyenini (taxminan 14,38 million USD) tashkil etib, o‘tgan yilga nisbatan uch barobardan ko‘proqqa o‘sgan. Bu o‘sish asosan Bitcoin opsionlari va derivativlaridan olingan daromadlar hisobiga yuz berdi. Bu haqda Cointelegraph.com xabar beradi.
Shunga qaramay, kompaniya 728 million USD miqdorida oddiy zarar ko‘rganini ma’lum qildi. Bunga asosiy sabab sifatida hisobot davrida Bitcoin narxining 24 foizga pasayishi va kompaniya balansidagi kriptoaktivlar bahosining qayta baholanishi ko‘rsatilgan. Coingecko ma’lumotlariga ko‘ra, Bitcoin narxi 1-yanvardagi 87 000 USDdan 31-martga kelib 66 000 USDgacha tushgan.
Metaplanet chorak yakunida o‘z aktivlaridagi Bitcoin miqdorini 40 177 donagacha yetkazdi. Kompaniya yangi aksiyalar chiqarish va Bitcoin garovi evaziga qarz olish orqali o‘z kripto-xazinasini kengaytirishda davom etmoqda. Shunga qaramay, aksiyadorlar uchun har bir aksiya hisobiga to‘g‘ri keladigan Bitcoin miqdori 2,8 foizga oshgan.
Kompaniya 2026-yil uchun yillik prognozlarini o‘zgarishsiz qoldirdi va 101 million USD miqdorida sof savdo hamda 72 million USD operatsion foyda kutmoqda. Biroq, Bitcoin narxining o‘zgaruvchanligi sababli sof foyda bo‘yicha aniq prognozlar berishdan tiyildi. Hisobot e’lon qilinganidan so‘ng, Metaplanet aksiyalari Tokio birjasida 3,82 foizga arzonlashdi.
“Zamin”ni Telegramʻda oʻqing!
