CrowdStrike kiberxavfsizlik kompaniyasi hisobotiga ko‘ra, 2025-yilda Shimoliy Koreya (DPRK) bilan bog‘liq xakerlar va kiberjinoyatchilar tomonidan o‘g‘irlangan kriptoaktivlar hajmi 2 milliard dollardan oshdi. Bu o‘tgan yilga nisbatan 51 foizga ko‘pdir, garchi hujumlar soni kamaygan bo‘lsa-da, o‘g‘irlangan mablag‘lar miqdori keskin o‘sgan. Bu haqda Cointelegraph.com xabar beradi.
Hisobotda qayd etilishicha, Shimoliy Koreya xakerlari kriptovalyuta foydalanuvchilariga tahdid soluvchi eng yirik guruh hisoblanadi. Ular asosan Web3 loyihalari va kriptobirjalarni nishonga olmoqda, chunki an’anaviy moliya tizimiga qaraganda kriptoaktivlarni anonim tarzda naqdlashtirish va o‘tkazish ancha osonroq.
Kiberjinoyatchilar nafaqat texnik hujumlar, balki ijtimoiy muhandislik usullaridan ham unumli foydalanmoqda. Masalan, 2025-yil aprel oyida Drift Protocol markazlashmagan kriptobirjasi xakerlar tomonidan buzib kirildi. Xakerlar kompaniya jamoasi bilan yirik konferensiyalarda tanishib, olti oy davomida ishonchli munosabat o‘rnatgan va yakunda zararli dasturiy ta’minot orqali 280 million dollar mablag‘ni o‘g‘irlagan.
Drift Protocol jamoasining ta’kidlashicha, ular bilan yuzma-yuz muloqot qilgan shaxslar Shimoliy Koreya fuqarolari bo‘lmagan. Xakerlar o‘z maqsadlariga erishish uchun uchinchi tomon vositachilaridan foydalanishi ma’lum bo‘ldi. Shuningdek, ZachXBT kabi kuzatuvchilar Shimoliy Koreya IT mutaxassislari turli texnologiya kompaniyalariga ishga kirib, oyiga 1 million dollargacha daromad topayotganini aniqlashgan.
“Zamin”ni Telegramʻda oʻqing!
