Federal zaxira tizimi (Fed) tomonidan eʼlon qilingan yangi hisobotga koʻra, 2025-yilda AQShdagi kattalar aholisining qariyb 10 foizi kriptovalyutalardan foydalangan yoki ularga investitsiya kiritgan. Bu koʻrsatkich soʻnggi uch yildagi eng yuqori natija boʻlib, 2023 va 2024-yillardagi oʻsish tendensiyasini tasdiqlaydi. Shunga qaramay, 2025-yilgi natijalar 2021-yildagi 12 foizlik rekord darajadan hali ham pastroq. Bu haqda Cointelegraph.com xabar beradi.
Kriptovalyutalarni kundalik toʻlov tizimlariga integratsiya qilish AQShdagi yirik kompaniyalar uchun asosiy yoʻnalishga aylandi. Xususan, Jack Dorsey asos solgan Block kompaniyasi 800 mingdan ortiq savdo nuqtalarida Bitcoin va steyblkoinlar orqali toʻlovlarni amalga oshirish imkonini yaratdi. Shuningdek, David Marcus boshchiligidagi Lightspark startapi Bitcoin Lightning Network texnologiyasini ommalashtirish ustida ishlamoqda.
Hisobotga koʻra, respondentlarning 9 foizi kriptovalyutani investitsiya vositasi sifatida koʻrsa, atigi 2 foizi toʻlovlar uchun, 1 foizi esa yaqinlariga pul oʻtkazish uchun ishlatgan. Qizigʻi shundaki, bank xizmatlaridan foydalanmaydigan aholi qatlami orasida kriptovalyuta operatsiyalari 6 foizni tashkil etib, bank mijozlari orasidagi koʻrsatkichdan (2 foiz) sezilarli darajada yuqori boʻlgan.
Toʻlovlar uchun kriptovalyutani tanlagan biznes vakillarining 25 foizdan ortigʻi tezlik, maxfiylik va arzonroq xarajatlar kabi afzalliklarni asosiy sabab sifatida keltirgan. Shu bilan birga, 10 foizdan kamrogʻi anʼanaviy bank tizimiga ishonchsizlik yoki xavfsizlik omillari tufayli kripto toʻlovlarni afzal koʻrishini bildirgan. Fed rahbariyati esa kriptoaktivlarga nisbatan ehtiyotkorona munosabatini saqlab qolmoqda.
“Zamin”ni Telegramʻda oʻqing!
