Bashorat bozorlari provayderi Polymarket AQSHda sport tadbirlari kontraktlari boʻyicha kombinatsiyalangan garovlarni (parlay) roʻyxatga olish uchun ariza topshirdi. Tovar fyucherslari savdosi boʻyicha komissiyaga (CFTC) taqdim etilgan hujjatga koʻra, kompaniya ikki yoki undan ortiq shartnomalarni birlashtiruvchi "kombinatsiyalangan natija kontraktlari"ni ishga tushirishni rejalashtirmoqda. Bu haqda Coindesk.com xabar beradi.
Ushbu tizimda foydalanuvchi tanlagan barcha natijalar amalga oshishi shart. Agar bitta natija notoʻgʻri boʻlib chiqsa, kontrakt qiymati nolga tenglashadi. Polymarket ushbu mahsulotlarni 2026-yil 21-maydan erta boʻlmagan muddatda birjaga chiqarish niyatida ekanligini maʻlum qildi. Kompaniya baʻzi tijorat sirlarini saqlash maqsadida ayrim hujjatlarni maxfiy tutishni soʻragan.
Shu bilan birga, SEC raisi Paul Atkins bashorat bozorlariga asoslangan birja investitsiya fondlari (ETF) masalasini koʻrib chiqayotganini bildirdi. Uning soʻzlariga koʻra, soʻnggi yetti yil ichida ETF aktivlari uch baravar koʻpaygan va yangi turdagi mahsulotlar investorlar uchun qoʻshimcha imkoniyatlar yaratadi. Atkins ushbu masalada jamoatchilik fikrini oʻrganish boʻyicha koʻrsatma bergan.
Bashorat bozorlari soʻnggi oylarda AQSH Kongressi va sudlarida katta muhokamalarga sabab boʻlmoqda. Shtat regulyatorlari va qimor oʻyinlari bilan shugʻullanuvchi firmalar sportga oid bashorat bozorlari shtatlarning soliqqa tortish huquqlarini buzayotganini taʻkidlamoqda. CFTC esa bu mahsulotlar federal darajada Commodity Exchange Act doirasida nazorat qilinishi kerakligini himoya qilmoqda.
Hozirda AQSH Oliy sudi ushbu masalani koʻrib chiqishi kutilmoqda. Qonun chiqaruvchilar ham bashorat bozorlari faoliyatini tahlil qilmoqdalar, biroq sohani tartibga soluvchi maxsus qonun loyihasi qachon taqdim etilishi hozircha nomaʻlum boʻlib qolmoqda.
“Zamin”ni Telegramʻda oʻqing!
