Chainalysis blokcheyn tahliliy platformasining soʻnggi hisobotiga koʻra, soliq toʻlashdan boʻyin tovlovchilar oʻz boyliklarini yashirish uchun Bitcoin Ordinals, BRC-20 tokenlari va boshqa yangi raqamli usullardan foydalanishni boshlagan. Soliq organlari texnologik taraqqiyotga moslashishga va kripto-aktivlar orqali amalga oshirilayotgan daromadlarni kuzatishga harakat qilmoqda. Bu haqda Cointelegraph.com xabar beradi.
Tadqiqotlar shuni koʻrsatadiki, AQSHda kriptovalyuta egalarining atigi 32 foizidan 56 foizigacha boʻlgan qismi oʻz foydalari haqida hisobot beradi. Norvegiyada esa bu koʻrsatkich yanada past boʻlib, 2024-yil avgustidagi maʻlumotlarga koʻra bor-yoʻgʻi 12 foizni tashkil etgan. Italiya iqtisodiy va moliyaviy politsiyasi yaqinda Bitcoin Ordinals va BRC-20 standartidan foydalanib, 1 million EUR miqdoridagi daromadni yashirgan shaxsni aniqladi.
Bitcoin tarmogʻida 2023-yilda joriy etilgan Ordinals protokoli har bir satoshi (Bitcoinʻning eng kichik birligi)ga seriya raqami berish va unga maʻlumotlarni joylashtirish imkonini beradi. Italiyadagi holatda gumonlanuvchi ushbu texnologiya yordamida tokenlar yaratgan, ularni birjalarda sotgan va tushgan foydani qaytadan Bitcoin hamyoniga yoʻnaltirib, yangi aktivlarga investitsiya qilgan.
AQSH Ichki daromad xizmati (IRS) hisob-kitoblariga koʻra, davlatga toʻlanishi kerak boʻlgan, ammo olinmagan soliqlar miqdori qariyb 606 milliard USD ni tashkil etadi. Odatda soliqdan qochish naqd pulda toʻlash yoki daromadni kamaytirib koʻrsatish orqali amalga oshiriladi, biroq kriptovalyutadan foydalanish blokcheynning shaffofligi sababli jiddiy xavf tugʻdiradi.
Chainalysis mutaxassislarining taʻkidlashicha, blokcheyn texnologiyasi oʻchmas iz qoldiradi va har qanday murakkab sxemani fosh qilish imkonini beradi. Blokcheyn tahlili orqali moliyaviy tarmoqlarni qayta tiklash va birjalar bergan maʻlumotlar bilan solishtirish orqali shubhali tranzaksiyalarni aniqlash mumkin. Italiyadagi ushbu holat kripto-aktivlarning texnik yangiligi anonimlikni kafolatlamasligini yana bir bor isbotladi.
“Zamin”ni Telegramʻda oʻqing!
