AQSH Vakillar palatasining Nazorat va hukumat islohotlari qoʻmitasi Kalshi va Polymarket kompaniyalari rahbarlariga insayderlik savdosi bilan bogʻliq holatlar yuzasidan soʻrov yubordi. Qoʻmita raisi James Comer kompaniya rahbarlari Shayne Coplan va Tarek Mansourdan platformalarda noqonuniy savdolarga qarshi qanday choralar koʻrilayotgani haqida ichki hisobotlarni taqdim etishni talab qildi. Bu haqda Cointelegraph.com xabar beradi.
Kongress aʼzolari orasida saylangan amaldorlarning hukumat harakatlari haqidagi maxfiy maʼlumotlardan foydalanib, bashorat bozorlarida foyda koʻrayotgani jiddiy xavotir uygʻotmoqda. Xususan, Eronning harbiy operatsiyalari oldidan 80 dan ortiq shubhali savdolar amalga oshirilgani aniqlangan. James Comerning taʼkidlashicha, insayder maʼlumotlariga ega siyosatchilarning garov oʻynashi va foyda olishiga chek qoʻyilishi kerak.
Shubhali savdolar orasida Isroilning Eronga qarshi harbiy harakatlari, Donald Trump tomonidan eʼlon qilinishi kutilgan sulh va Kongress saylovlari bilan bogʻliq shartnomalar mavjud. Polymarket mart oyida insayderlikka qarshi kurash usullarini yangilaganini bildirgan boʻlsa, Kalshi aprel oyida oʻz saylov natijalari uchun garov tikkan uch nafar amerikalik siyosatchini bloklaganini maʼlum qilgan edi.
Shuningdek, AQSH Adliya vazirligi Venesuela prezidenti Nicolás Maduro asirga olinishi bilan bogʻliq maxfiy maʼlumotlardan foydalanib, Polymarket platformasida 400 000 USD dan ortiq foyda koʻrgan harbiy xizmatchi Gannon Ken Van Dykega nisbatan jinoiy ish ochgan. U firibgarlik va maxfiy maʼlumotlardan shaxsiy manfaat yoʻlida foydalanishda ayblanmoqda.
“Zamin”ni Telegramʻda oʻqing!
