VanEck investitsiya kompaniyasi payshanba kuni AQSHda ilk bor BNB spot birja fondini (ETF) ishga tushirganini eʻlon qildi. VBNB tikeri ostida savdo qilinadigan ushbu fond investorlarga Binance ekotizimi bilan bogʻliq kriptovalyutaga anʻanaviy brokerlik hisobvaraqlari orqali tartibga solingan holda sarmoya kiritish imkonini beradi. Bu haqda Cointelegraph.com xabar beradi.
Eʻlonga koʻra, ETF jismoniy jihatdan malakali kastomian tomonidan sovuq hamyonlarda saqlanadigan BNB tokenlari bilan taʻminlangan. BNB Chain tarmogʻining asosiy aktivi hisoblangan ushbu token tranzaksiya toʻlovlarini amalga oshirishda qoʻllaniladi. VanEck kelajakda huquqiy toʻsiqlar boʻlmasa, fond tarkibiga steyking mexanizmini ham qoʻshishni rejalashtirmoqda.
VanEck vakillari BNB Chain tarmogʻini kundalik faol foydalanuvchilar va tranzaksiyalar hajmi boʻyicha eng yirik blokcheynlardan biri deb atadi. Hozirda tarmoqda 16 milliard dollardan ortiq stablecoin taʻminoti va qariyb 3,6 milliard dollarlik tokenizatsiya qilingan real aktivlar (RWA) mavjud.
CoinGecko maʻlumotlariga koʻra, BNB qariyb 85,5 milliard dollar boʻlgan bozor kapitallashuvi bilan dunyodagi eng yirik beshta kriptovalyuta qatoriga kiradi. Ayni paytda token 633 dollar atrofida sotilmoqda va uning kunlik savdo hajmi 874 million dollarga yaqinlashgan.
Soʻnggi oylarda AQSH moliya bozorida muqobil blokcheyn tarmoqlari bilan bogʻliq kripto-mahsulotlar oqimi kuchaydi. Avvalroq VanEck Avalanche (AVAX) uchun ETF chiqargan boʻlsa, 21Shares va Bitwise kompaniyalari Hyperliquid (HYPE) asosidagi fondlarni ishga tushirdi. Shuningdek, Goldman Sachs kabi yirik banklar ham faol boshqariladigan Bitcoin strategiyalariga qiziqish bildirmoqda.
“Zamin”ni Telegramʻda oʻqing!
