Memkoinlarni ishga tushirish platformasi hisoblangan DxSale kiberhujumga uchradi, natijada BNB Chain tarmogʻidagi 1400 ga yaqin likvidlik provayderlari (LP) 7,3 million dollar mablagʻidan ayrildi. PeckShield blokcheyn maʼlumotlar platformasining X tarmogʻidagi xabariga koʻra, hujumchi "0xC457" manzili orqali 1,87 million dollarlik BNB tokenlarini ikkita asosiy hamyonga oʻtkazgan va keyinchalik ularni Binance birjasidagi bir nechta depozit manzillariga joylashtirgan. Bu haqda Cointelegraph.com xabar beradi.
DxSale platformasi 2021-yilda BNB Chain tarmogʻida chiqarilgan tokenlar uchun likvidlikni bloklash maqsadida keng foydalanilgan edi. Blokcheyn tahlilchisi Tahaxʻning taʼkidlashicha, platforma lokerida (qulflash tizimi) hali ham yillar oldin boshlangan loyihalarning likvidligi saqlanib qolgan. Eksploytni amalga oshirgan hamyon yangi yaratilgan boʻlib, u Bybit kripto birjasi orqali moliyalashtirilgani aniqlangan.
Ushbu hodisa markazlashmagan moliya (DeFi) sohasidagi xavfsizlik muammolarini yana bir bor kun tartibiga chiqardi. DefiLlama maʼlumotlariga koʻra, may oyida DeFi xakerliklari natijasida 52 million dollar oʻgʻirlangan. Aprel oyida esa bu koʻrsatkich 634 million dollarni tashkil etib, soʻnggi bir yildagi eng yuqori darajaga yetgan edi. Sunʼiy intellektning zararli maqsadlarda qoʻllanishi xavotirlarni yanada oshirmoqda.
OpenZeppelin asoschisi Manuel Aráoz smart-kontraktlardagi zaifliklarni aniqlashda sunʼiy intellekt imkoniyatlari kengayib borayotganini aytib, endilikda butun DeFi sektorini xavfli deb hisoblashini bildirdi. Tahlilchilarning soʻzlariga koʻra, DxSale shartnomasida "backdoor" (maxfiy kirish yoʻli) qoldirilgan boʻlishi mumkin, bu esa xakerga BNB tokenlarini ommaviy ravishda yechib olish imkonini bergan.
Hozirgi vaqtda xaker mablagʻlarning bir qismini kuzatish qiyin boʻlgan infratuzilmalar orqali oʻtkazishga ulgurgan. Coinsult xavfsizlik platformasi xakerning yechib olish sikllaridan foydalanganini tasdiqladi. DefiLlama maʼlumotlariga koʻra, kripto olamidagi umumiy yoʻqotishlar 17 milliard dollardan oshib ketgan, shundan 7,8 milliard dollari aynan DeFi protokollari hissasiga toʻgʻri keladi.
“Zamin”ni Telegramʻda oʻqing!
