Cardano Foundation boshqaruv hamjamiyati tadbirni gʻazna tokenlari hisobidan moliyalashtirish boʻyicha qayta koʻrib chiqilgan taklifni rad etganidan soʻng, 2026-yilgi yillik konferensiyasini bekor qildi. Jamgʻarma juma kuni yakunlangan ovoz berish jarayonidan soʻng, jamoatchilik qarorini hurmat qilishini va boshqaruv nafaqat ishtirok etishni, balki jamoaviy qarorlarni qabul qilish majburiyatini ham anglatishini maʼlum qildi. Bu haqda Cointelegraph.com xabar beradi.
Mazkur taklif doirasida tadbirni oʻtkazish uchun qiymati 1,84 million dollarga teng boʻlgan 7,8 million Cardano (ADA) tokenlaridan foydalanish koʻzda tutilgan edi. Ovoz berish natijalariga koʻra, ishtirokchilarning 65,2 foizi loyihani qoʻllab-quvvatladi, biroq bu koʻrsatkich qaror qabul qilinishi uchun zarur boʻlgan 66,67 foizlik chegaradan biroz kamlik qildi. Cardano Summit deb nomlangan konferensiya 5-6-oktabr kunlari Singapurda boʻlib oʻtishi rejalashtirilgan edi.
Ushbu ovoz berish jarayoni Cardano asoschisi Charles Hoskinson va gʻazna xarajatlarini qisqartirishni talab qilayotgan Delegated Representatives (DReps) oʻrtasidagi bir necha oylik kelishmovchiliklarning davomi boʻldi. Avvalroq, 9-may kuni DReps vakillari 14 million ADA tokenini sarflashni nazarda tutuvchi shunga oʻxshash taklifga qarshi chiqqan edi. Oʻshanda vakillarning atigi 10 foizi loyihani yoqlagan, bu esa jamgʻarmani soʻralayotgan mablagʻ miqdorini kamaytirishga majbur qilgan edi.
Konferensiya bekor qilinganiga qaramay, Cardano blokcheynining investitsiya boʻlimi hisoblangan EMURGO kompaniyasi 7-8-oktabr kunlari Singapurda oʻtadigan TOKEN2049 konferensiyasida ekotizim nomidan qatnashish boʻyicha taklifni tasdiqlatishga muvaffaq boʻldi. Charles Hoskinson hozirda TOKEN2049 doirasida stend koʻlamini kengaytirish va u yerda kichik formatdagi "MiniSummit" tashkil etish imkoniyatlarini koʻrib chiqmoqda.
Hozirgi vaqtda Cardano tokenining bozor kapitalizatsiyasi 8,8 milliard dollarni tashkil etadi. Biroq, tarmoqning protokolda bloklangan umumiy qiymati (TVL) 129 million dollardan kam boʻlib, bu koʻrsatkich boʻyicha u blokcheynlar reytingida 28-oʻrinni egallab turibdi.
“Zamin”ni Telegramʻda oʻqing!
