Zafar Hoshimov deputatlarga prezident qarori ijrosini ta’minlash bo‘yicha murojaat yo‘lladi

«Korzinka.uz» supermarketlar tarmog‘i asoschisi Zafar Hoshimov deputatlardan O‘zbekistondagi mehnat faoliyati bo‘yicha qabul qilingan qaror ijrosini ta’minlashni so‘radi.

O‘zbekistonda 13 mln 600 ming kishi band bo‘lib, shundan rasmiy sektorda band bo‘lganlar soni 6 mln 100 ming kishini, norasmiy sektorda 5 mln 700 nafar, chet elda ishlayotganlar soni 1 mln 800 ming kishini tashkil etadi.

Zafar Hoshimov mamlakatning butun mehnatga layoqatli aholisining deyarli yarmi norasmiy, kafolatlangan huquqsiz, muntazam maoshsiz, ertangi kunga ishonchsiz mehnat qilayotganini ta’kidladi.

- Bu millionlab yurtdoshlarimiz necha soat, qanday sharoitda ishlayotgani, ularga ta’til va dam olish kunlari berilganmi yo‘qmi noma’lumligini bildiradi, — deb yozadi u.

Tadbirkor eng yomoni pensiya masalasi ekanligini, bu odamlar keyinchalik pensiya yoshiga yetib, butun umr mehnat qilganini isbotlay olmasligini aytgan.

- Mehnat bozoridagi ushbu nozik masalaga davlat tomonidan e’tibor qaratila boshlaganidan juda mamnunman, — deb davom etadi Zafar Hoshimov.

Taksi haydovchilariga yakka tartibdagi tadbirkor maqomining berilishi kamida yuz minglab bu sohada mehnat qiluvchilarga o‘z ish joylarini qonuniylashtirish imkoniyati va kafolatlarini berdi.

- Bu millionlab norasmiy ish bilan band bo‘lganlarning aksariyati xizmat ko‘rsatish, umumiy ovqatlanish va chakana savdo sohalarida band, — deydi «Korzinka.uz» supermarketlar tarmog‘i asoschisi.

Prezidentning 2022 yil 27 yanvardagi qarori bilan ish beruvchilar o‘z ish joylarini qonuniylashtirish maqsadida iqtisodiyotning ushbu tarmoqlarida yagona ijtimoiy to‘lov miqdorini 12 foizdan 1 foizga kamaytirish belgilandi.

- Bu barcha to‘siqlarni tubdan bartaraf etuvchi, millionlab ishchilarni norasmiy bandlikdan formal sektorga olib chiquvchi oqilona qaror. U orqali umumiy ovqatlanish va chakana savdo sohalarida ish o‘rinlarini yaratish va qonuniylashtirish rag‘batlantiriladi, — deb yozadi u.

Afsuski, aprel oyi boshidan kuchga kirgan mazkur farmonda ko‘rsatilgan chora-tadbirlar haligacha to‘liq amalga oshirilmayapti.

Jumladan, qonunchilar mazkur farmonda belgilangan korxonalarning ijtimoiy to‘lovlarini kamaytirish to‘g‘risidagi qoidalarini amaldagi Soliq kodeksiga kiritmagan.

Hoshimovning aytishicha, huquqiy tomondan, farmon qaysidir ma’noda to‘xtatib qo‘yilgan, u bilan birga norasmiy ishlayotgan millionlab vatandoshlarimizning huquqlari va taqdiri ham.

- Deputatlarimizdan Prezidentimiz boshlagan ezgu ishni oxiriga yetkazishni, Soliq kodeksining tegishli bo‘limlariga qarorda ko‘rsatilgan o‘zgartirishlarni kiritishni so‘rab murojaat qilaman, — deb yozadi Zafar Hoshimov.

Tadbirkor murojaatini millionlab mehnatkash vatandoshlarimizga imkoniyat, huquq va xavfsiz kelajakni bering, deya yakunlaydi. “Zamin” yangiliklarini “Instagram”da kuzatib boring