Maryam Tillaeva: «Bobomning joni uzilganida ular yotgan xonaga kirgan paytim bir holat koʻz oʻngimda qolib ketgan»

Instabloger Maryam Tillaeva «Famitime TV» YouTube kanaliga bergan intervyusida bobosi bilan bogʻliq xotiralari, ota-onasi bilan munosabatlari, ularning AQShdagi hayoti, prezident oilasida tarbiya olgan vaqtda unga qanday cheklovlar qoʻyilgani haqida gapirib berdi.

Maryam Tillaeva ota-onasi va bobosi bilan bogʻliq xotiralari haqida

«Ham otasi, ham onasi ishlaydigan farzandning koʻplab imkoniyatlari boʻladi: qoʻshimcha darslarga boradi va boshqa mashgʻulotlar bilan shugʻullanadi. Men ota-onamga barcha sharoitlarni yaratib bergani uchun minnatdorchilik bildiraman. Doʻstlarim bilan toʻrtta tilda har qanday mavzuda gaplasha olaman. Avvalari ota-onamga menga yetarlicha mehr bera olmagandek tuyular edi, aslida ular mening kelajagim uchun harakat qilgan ekan, buni endi tushunyapman.

Yoshligimizda ijtimoiy tarmoqlardan foydalanish mumkin emas edi, bu esa hayotda bizni himoyalash uchun kerak ekan. Men esa ijtimoiy tarmoqlardan foydalanishni istar edim. Ota-onam bilan munosabatlarimiz yaxshi boʻlgan, dadam har doim mening voleybol va tennisdagi oʻyinlarimga borgan. Onam Jenevada YuNESKO elchisi edi, oramizda nimadir yetishmagandek tuyular edi. Masalan, men hozir 23 yoshdaman, onam 21 yoshda qanday qilib menga qaraganini tasavvur qila olmayman.

^{Foto: Instagram /@mashatilly}
10 yoshimgacha Toshkenda yashaganmiz, keyin oilaviy Latviyaga koʻchib oʻtganmiz. Undan keyin Parij, Shveytsariya va AQShga koʻchib oʻtganmiz, bir joyda 3 yoki 1 yil yashaganmiz. Ota-onam bilan bogʻga, sport mashgʻulotlariga borganman, bobom bilan bogʻliq yaxshi xotiralar bor. Bobom bilan har yozda koʻrishar edim, meni suyukli nevarasi deb bilar edi. Ular oʻz vaqtida onamga ajrata olmagan vaqtini menga bagʻishlardilar. Men tugʻilganimda oʻziga otalik rolini olgandek boʻlgan. Bobom menga tennis oʻynashni, suzishni oʻrgatgan, hatto ilk marta mashina ruliga oʻtirganimda ham ular yonimda edilar», — deydi Maryam Tillaeva.

^{Foto: Instagram /@mashatilly}
Prezident oilasida katta boʻlgan paytidagi cheklovlar haqida

«Hamma sendan biror narsani xohlaydi, shuning uchun odamlarga qattiq ishonmaslikni, qalb eshiklarini ochmaslikni, hech narsani aytmaslikni tayinlashar edi. Kechasi hech qaerga bormaslik kerak edi.

Doʻstlarimning hammasini uyga olib kela olmaganman, ota-onam ularni tekshirishi kerak edi. Yaqinda bir doʻstimni koʻrib qoldim, Shveytsariyada qoʻshnimiz boʻlgan, u bilan munosabatlarimiz yaxshi edi. Yoshligimda faqat maktabga va tennisga borardim, atrofimda ham oʻqituvchim, qoʻriqchilar, trenerlarim boʻlar edi», — deydi Maryam.

Maryam Tillaeva xolasi Gulnora Karimova haqida

«Kattalarning oʻzaro kelishmovchiliklari tufayli xolavachcham Imon bilan uzoq yillar gaplasha olmaganimdan afsuslanaman. Yaxshiki, hozir ota-onam u bilan gaplashishimga toʻsqinlik qilmaydi. Umuman olganda, kattalar oʻz muammolariga yosh bolalarni aralashtirishi unchalik toʻgʻri emas, deb oʻylayman. Xolam va uning qizi Imondan xavotirdaman. Imon bir necha yildan beri onasi bilan gaplasha olmaydi, men buning qanchalik qiyin ekanligini his etaman. Ular juda kuchli, hammasi yaxshi boʻlishiga umid qilaman», — deydi instabloger.

Instabloger ota-onasining AQShdagi hayoti toʻgʻrisida

«Onam 22 yoshda boʻlganida qoʻngʻizni eslatuvchi Volkswagen mashinasi boʻlgan. Onam rasm chizishni yaxshi koʻradi, qaysidir ma'noda men unga oʻxshayman. Onam meni dunyoga keltirgandan keyin Londondagi oʻqishini toʻxtatgan. Balki shuning uchun meni har doim oldinga intilishga undagandir, buning uchun unga rahmat aytaman. Onamning u yerda oʻqishini hech kim xohlamagan, u yozda Evropaga borib shu yerga oʻqishni istagan, ota-onasi qarshi boʻlgan boʻlsa ham borgan.

Otam onam bilan oʻsha yerda tanishgan, qachon oʻqishni toʻxtatgani esimda yoʻq. Ular bizga yoshligida qanday hayot kechirishni istagan boʻlsa shuni yaratishga harakat qilgan. Bizning kasbimizga qarshi bormagan, kosmonavt, oʻqituvchi, bloger boʻlsak ham qarshilik bildirmasligini aytgan», — deydi Maryam Tillaeva.

^{Foto: Instagram /@mashatilly}
Instabloger Oʻzbekistonga kelishining sababi toʻgʻrisida

«Toshkentga yarim yil oldin bordim, undan oldin esa 2016 yilda borgan edim, bobom vafot etganidan keyin bormaganman. Uning soʻnggi kunlarida buvim, oyim va men yonlarida boʻlganmiz. Otam oʻshanda ukam hamda singlim bilan Los-Anjelesda qolgandi. Bobomning oʻlimidan soʻng bir holat koʻz oʻngimda qolib ketgan. Shifokor uning yuragi urishdan toʻxtaganini aytganida, hammamiz u yotgan xonaga yugurganmiz. Zinadan tushib borar ekanmiz, sarosimadan buvim va onamning oyoqlaridagi shippaklar otilib ketgan. Men oʻshanda xonaga kirganimda bobomning yonida uzoq yillar birga boʻlgan kuchli, kap-katta, baquvvat erkaklar yurakdan yigʻlayotganini koʻrganman. Bu holat meni qattiq ta'sirlantirgan. Shundan soʻng men Oʻzbekistonga qaytmadim. Bobom bilan oʻrtamizda juda katta rishta bor edi», — deydi Maryam. “Zamin” yangiliklarini “Telegram”da kuzatib boring