08:38 / 01.08.2023

Bu yil maktab darsliklari uchun ijara puli olinmaydi

^{Usmon Sharifxo‘jayev.}^{Foto: AOKA}

O‘zbekiston davlat maktablarida yangi o‘quv yilida beriladigan darsliklar uchun ijara haqi olinmaydi. Bu haqda maktabgacha va maktab ta’limi vazirining birinchi o‘rinbosari Usmon Sharifxo‘jayev ma’lum qildi, deya xabar berdi “Daryo”.

Usmon Sharifxo‘jayevning aytishicha, 2022 yildan beri darsliklar uchun ijara puli olinmayapti.

“O‘tgan yilgi jarayonlardan kelib chiqib, joriy yil uchun ham maktab darsliklariga ijara to‘lovlari olinmaydi. Bu bo‘yicha prezident tomonidan alohida topshiriq berilgan. O‘tgan yili ham darsliklar uchun ijara puli olinmagan. 2022 yilda bu jarayon (ijara haqi olish) to‘xtatilgan”, — dedi vazir o‘rinbosari.

Usmon Sharifxo‘jayev darsliklarni yangilash borasidagi tartib to‘g‘risida ham ma’lumot berdi.

“Amaldagi qonunchilikda darsliklar 5 yilda bir marta yangilanishi belgilangan. Shu jarayonni o‘zida ayrim ota-onalar orasida noto‘g‘ri talqin mavjud. Ya’ni berilayotgan prezident sovg‘alari ichida darsliklar ham sovg‘a deb tushunishadi. Unday emas, darsliklar davlat mulki va uni ishlatgandan keyin qaytarish kerak”, — dedi u.

Maktabgacha va maktab ta’limi vazirligi axborotiga ko‘ra, ayni paytda O‘zbekistonda 10 ming 296 ta maktab faoliyat yuritmoqda. Kuzda boshlanadigan yangi o‘quv yili uchun maktablarga jami 732 ming nafar bola qabul qilish rejalashtirilgan. Hozirgacha topshirilgan hujjatlar soni ushbu raqamning 80 foiziga teng bo‘lmoqda. Ayni kunlarda maktablarga qabul davom etyapti.