Jizzaxda katta tezlikda harakatlangan «Jiguli» 5 ta mashinani pachaqladi

^{Foto: Videodan kadr}

Ijtimoiy tarmoqlarda «Jiguli» mashinasi Jizzax shahrida katta tezlikda harakatlangani va bir nechta mashinani pachaqlagani aks etgan video tarqaldi. Holat yuzasidan viloyat IIB YHXB axborot xizmati xabar berdi.

Ma’lum qilinishicha, hodisa 2023 yil 1 dekabr kuni soat 13:30 lar atrofida Jizzax shahri, «Shodlik» MFY hududidan o‘tgan 4R-36 Jizzax—Yangi qishloq—Qizilcha avtomobil yo‘lida sodir bo‘lgan.

Haydovchi «Jiguli» bilan Forish—Jizzax yo‘nalishi bo‘ylab harakatlanayotib, boshqaruvni yo‘qotgan va yo‘l chetida turgan mashinalarga borib urilgan.

Oqibatda «Jiguli» haydovchisi bosh miya jarohati bilan shifoxonaning jonlantirish bo‘limiga yotqizilgan. Mashinada bo‘lgan ikki nafar yo‘lovchiga tez tibbiy yordam ko‘rsatilgan.

Hodisada «Jiguli»dan tashqari 5 ta mashinaga moddiy zarar yetgan. Hozirda holat yuzasidan dastlabki surishtiruv ishlari olib borilmoqda.