O‘zbekiston bo‘yicha 15-17 dekabr kunlariga ob-havo prognozi berildi. Unga ko‘ra:
Ushbu haftaning birinchi yarmida qor va sovuq ob-havo olib kelgan sovuq antisiklon O‘zbekiston hududidan tez chekinmoqda.
"O‘zgidromet" xabariga ko‘ra, respublika hududining katta qismida harorat kechalari -0...-5 darajagacha kuchsizlashadi, bugun kunduzi esa havo +4...+9 darajagacha ko‘tariladi. Respublikaning shimolida ham havo iliqlashadi, ammo kunduz kuni hali ham harorat -3...-8 daraja atrofida bo‘ladi.
Bugun kunduzi O‘zbekiston hududining katta qismida yog‘ingarchilik kutilmaydi, faqat respublikaning janubiy va janubi-g‘arbiy hududlarida kechga tomon ba’zi joylarda asosan yomg‘ir ko‘rinishidagi biroz yog‘ingarchilik bo‘ladi.
Ertaga janubiy hududlardan nam havo massasi respublikaning markaziy hududlariga tarqaladi. Toshkent, Samarqand, Jizzax, Sirdaryo, Qashqadaryo va Surxondaryo viloyatlarida yomg‘ir va qor ko‘rinishida biroz yog‘ingarchilik bo‘ladi. Kunduzgi havo harorati +0...+5 darajagacha biroz pasayadi.
Tog‘li hududlarda asosan qor ko‘rinishidagi yog‘ingarchilik bo‘ladi.
17 dekabr - yakshanba kuni respublikaning barcha hududlari bo‘yicha yog‘ingarchiliksiz ob-havo bo‘lishi kutilmoqda. Kechasi harorat -0...-5 daraja, shimolda -5...-10 daraja, kunduzi +2...+7 daraja bo‘ladi.
Respublika bo‘yicha ba’zi joylarga tuman tushadi. Ayrim joylarda shamol 15-20 m/s gacha kuchayishi mumkin.
Poytaxtda bugun va yakshanba kuni yog‘ingarchilik kutilmaydi, shanba kuni vaqti-vaqti bilan biroz yog‘ingarchilik (yomg‘ir, qor) bo‘ladi. Kechasi va ertalab tuman tushishi mumkin.
Harorat 15 dekabrda +6...+8 daraja, 16-17 dekabrda kechasi -3...+2 daraja, kunduzi 16 dekabrda +0...+2 daraja, 17 dekabrda +3...+5 daraja bo‘ladi.
“Zamin” yangiliklarini “Telegram”da kuzatib boring