Saidaziz Saidaliyev 20 yilga ozodlikdan mahrum etildi

^{Foto: Oliy sud}
“Saidaziz medgorodok” nomi bilan tanilgan Saidaziz Saidaliyev 20 yilga ozodlikdan mahrum etildi. Bu haqda 5 avgust kuni jinoyat ishlari bo‘yicha Yunusobod tumani sudidan Kun.uz xabar bermoqda.

Saidaliyev tovlamachilik, firibgarlik, jinoiy uyushma tashkil etish, jinoiy faoliyatdan olingan daromadlarni legallashtirish, bezorilik, pora berishda ishtirok etish jinoyatlari sodir qilgan deb topildi.

U jazoni umumiy koloniyada o‘tashi belgilandi.

Sud majlisida yana 28 kishiga nisbatan hukm o‘qilmoqda. Bu haqda tez orada xabar beriladi.

Saidaziz Saidaliyev qo‘lga olingani haqida poytaxt IIBB 2023 yil 2 dekabr kuni ma’lum qilgandi.

Ayblovga ko‘ra, 37 yoshli Saidaliyev sport bilan shug‘ullangan jismonan baquvvat shaxslarni o‘z atrofiga to‘plab, qator jinoyatlarni sodir etgan. Xususan, qarzdorlik va boshqa muammolari bo‘lgan shaxslarning muammolarini qonunni chetlab o‘tgan holda hal qilib berish evaziga moddiy jihatdan manfaatdor bo‘lish, tahdidlar yo‘li bilan pul mablag‘larini noqonuniy qo‘lga kiritish, bezorilik va tamagirlik holatlari shular jumlasidan.

O‘tgan yili noyabr-dekabr oylarida “ko‘cha olami” vakillari ekani aytiladigan boshqa qator shaxslar ham ushlandi. Iyul oyida “Baxti Tashkentskiy” nomi bilan tanilgan Baxtiyor Qudratullayev 20 yilga ozodlikdan mahrum etilgandi. “Zamin” yangiliklarini “Odnoklassniki”da kuzatib boring