Shahram Gʻiyosov ayiq bilan mashgʻulot oʻtkazgani uchun uzr soʻradi (video)

Avvalroq bokschi Shahram Gʻiyosovning ogʻzi berkitilgan ayiq bilan jang qilayotgani aks etgan videosi tarqalgach, Ekologiya vazirligi holat oʻrganilayotganini ma'lum qilgandi. Vazirlik axborot xizmati holat boʻyicha qoʻshimcha ma'lumot berdi.

Ma'lum qilinishicha, Shahram Gʻiyosovga nisbatan Ma'muriy javobgarlik toʻgʻrisidagi kodeksning 111-moddasiga (hayvonlarga nisbatan shafqatsiz munosabatda boʻlish) koʻra ma'muriy bayonnoma rasmiylashtirildi.

Huquqbuzar BHMning 3 baravari — 1 mln 125 ming soʻm miqdorida jarimaga tortildi. Shuningdek, ayiq Fargʻona hayvonot bogʻiga topshirildi.

Shahram Gʻiyosov vazirlikka chaqirtirilib, jismoniy shaxslar tomonidan yovvoyi hayvonlarni saqlash va turli maqsadlarda foydalanish, hayvonlarga shafqatsiz munosabatda boʻlish taqiqlangani tushuntirildi.

“Oʻz navbatida Shahram Gʻiyosov uzr soʻrab, oʻz xatosini tushunib etgani va bunday holat boshqa takrorlanmasligini ta'kidladi”, deyiladi xabarda.

Vazirlar Mahkamasining “Yovvoyi hayvonlarni saqlash tartibini takomillashtirish chora-tadbirlari toʻgʻrisida”gi qaroriga koʻra, 2025 yil 1 yanvardan jismoniy shaxslar tomonidan yarim erkin sharoitlarda, sun'iy yaratilgan yashash muhitida yoki tutqunlikda saqlanishi taqiqlangan yovvoyi hayvonlar roʻyxati tasdiqlangan.

Ushbu roʻyxatga ayiqlarning barcha turi kiritilgan. Ya'ni boshqa hayvonlar qatori ayiqlarni ham davlat va mobil tsirklarida (shapitolar) saqlash hamda ulardan tsirk tomoshalarini oʻtkazish maqsadlarida foydalanish taqiqlanadi. “Zamin” yangiliklarini “Telegram”da kuzatib boring