Komil Allamjonovga suiqasd ishiga aloqador yana bir sud tafsiloti (video)

2024 yilning 26 oktyabr kuni tunda sobiq amaldor Komil Allamjonovga suiqasd uyushtirilgandi. Bosh prokuratura bergan ma'lumotga koʻra, ichida Allamjonov boʻlgan Range Rover Qibray tumanining Ifor koʻchasi boʻylab harakatlanib kelayotgan paytda ikki nafar noma'lum shaxs mashinaga oʻqotar quroldan bir necha marotaba oʻq uzib, voqea joyidan yashiringan.

Holat yuzasidan Jinoyat kodeksining 25, 97-moddasi (qasddan odam oʻldirishga suiqasd qilish) bilan jinoyat ishi qoʻzgʻatilib, 27 oktyabr kuni ushbu jinoyatni sodir etgan shaxslarning biri aniqlanib, gumonlanuvchi tariqasida ushlangan. 28 oktyabr kuni yana uch nafar, noyabr oyida esa 5 kishi qamoqqa olingan.

Mazkur voqealar fonida, aynan suiqasd sodir boʻlgan kuni Allamjonovga xizmat qiluvchi 7 nafar fuqaro ham mayda bezorilikda ayblanib, imi-jimida sud qarori bilan 15 sutkaga qamalgan. Jinoyat ishlari boʻyicha Qibray tuman sudi qarori, shuningdek, ularga nisbatan ma'muriy bayonnoma tuzgan organ xodimlaridan norozi boʻlgan 7 nafar fuqaro 15 sutka oʻtirib chiqqach, Oliy sudga kassatsiya tartibida shikoyat kiritgan. 2025 yilning 13 yanvar kuni Oliy sudda ana shu shikoyatchilar ishini koʻrib chiqish boshlandi.

^{Foto: Advokat Davron Saidov}

"Men 2024 yil 26 oktyabrda sodir boʻlgan voqeada ayblanib, ma'muriy javobgarlikka tortilgan etti nafar fuqaroning manfaatlarini himoya qilyapman. Ular Komil Allamjonov yonida, u bilan birga ishlaydigan insonlar boʻlgan. Xabaringiz bor, Allamjonovga 2024 yilning 25 oktyabrdan 26 oktyabrga oʻtar kechasi suiqasd qilingan edi. Ushbu etti fuqaro ofitserlar va haydovchilar safiga kiradi. Ularning jinoyatda ishtirokini aniqlash maqsadida operativ guruh a'zolari chaqirib, soʻroq qilgan. Kun davomida ular tushuntirish bergan.

Ammo kechga borib, barcha jarayonlar yakunlanganidan soʻng, Qibray tuman IIB xodimlari ularga mayda bezorilik toʻgʻrisidagi bayonnomalarni imzolashni taklif qilgan. Himoyam ostidagi 7 nafar fuqaro IIB xodimlarining bu talabini rad etib, bayonnomani imzolashdan bosh tortgani sababli xodimlar ularni tuman boʻlimiga olib ketgan. Ularga advokatlar taqdim qilinmagan, shuningdek, ular sudda ham eshitilmagan. Sudya shunchaki 15 sutkalik ma'muriy qamoqqa olish haqida qaror chiqargan. Bu qaror ustidan yuqori instantsiyaga shikoyat qilish taklif qilindi, ammo 2024 yilning 3 noyabr kuniga qadar advokatlar sud qarori ustidan shikoyat qila olishmadi.

Ularga bunga ruxsat berilmadi. Menga Komil Allamjonovning oʻzi ma'muriy huquqbuzarlik ishi bilan tanishishni taklif qilib, murojaat qilgach, ishni oʻrgandik. Ish bilan tanishib chiqqanimizdan soʻng aslida ma'muriy huquqbuzarlik holati sodir boʻlmagan, bu fuqarolar sud hujjatida aytilganidek, kafe oldida ichimliklar ichib yoki qandaydir bezorilik qilmagani ma'lum boʻldi. Profilaktika inspektori ham faqatgina yozuv asosida bayonnoma tuzgani oydinlashdi", deydi advokat Davron Saidov.

Advokatga koʻra, Toshkent viloyat sudi mayda bezorlikda ayblanib, 15 sutkaga qamalganlar boʻyicha appelyatsiya shikoyatini koʻrishni rad etgan.

"Apellyatsiya shikoyati berilganidan soʻng, sud ularning ishtirokisiz ishni koʻrib chiqishni rad etdi. Ma'muriy javobgarlikka tortish uchun esa shaxsiy ishtirokni ta'minlash lozim edi. Sud ma'muriy qamoqqa olingan shaxslar ishtirokini ta'minlashi shart boʻlgani uchun 15 sutkani toʻliq oʻtashdi. Shundan soʻng men nazorat tartibida shikoyat tayyorladim va 2025 yil 13 yanvarda ishni koʻrib chiqish boshlandi. Ettita fuqarodan olti nafari sudga keldi, bir nafari esa xabardor qilinmagan edi. Mening iltimosimga koʻra, ish 2025 yil 23 yanvargacha kechiktirildi", deydi aybsiz aybdor qilinganlarni himoya qilayotgan advokat.

Davron Saidovning aytishicha, 13 yanvar kuni boshlangan sud majlisida u 7 nafar fuqaroga nisbatan ma'muriy huquqbuzarlik toʻgʻrisidagi bayonnomani tuzgan organni ham sudga chaqirishni iltimos qilgan.

"Umid qilamanki, bu ish sud tizimidagi kamchiliklarni koʻrsatadigan misol boʻladi. Xususan, guvohlar bilan uchrashuvlar uchun advokatlarning erkinligi ta'minlanmayapti. Shu bilan birga, Oʻzbekiston Respublikasi Konstitutsiyasida “Himoya advokaturasiga bagʻishlangan” maxsus bob kiritilgan. Bu konstitutsiyada bu bob borligi katta yutuq, lekin vaqti keldi, bu Konstitutsion me'yorlar amalda ishlashi kerak. Buning uchun advokatlarning oʻz himoyasida yuradiganlar bilan uchrashuvlariga toʻsqinlik qiluvchi koʻplab normativ-huquqiy hujjatlarni bekor qilish zarur.

Advokatlar himoyasidagi shaxslar bilan uchrashuv imkoniyatiga ega emasligi sharoitida, biz bu ishda koʻrganidek, turli adolatsizlik yuzaga kelmoqda, ya'ni sud jarayoni ma'muriy javobgarlik toʻgʻrisidagi kodeksda belgilangan normalarni buzish bilan oʻtkazildi. Ularning ma'muriy qamoqda saqlanishi milliy qonunchilik va Oʻzbekiston Respublikasining Xalqaro fuqarolik va siyosiy huquqlar pakti doirasidagi xalqaro majburiyatlariga zid edi. Fuqarolarimiz adolatli sudlov huquqidan mahrum boʻldi", deydi himoyachi.

Advokatning OAV vakillari savoliga javob qaytarishicha, 7 nafar fuqaroning aybsiz aybdor qilinishi, shuningdek, sudlarda advokatlar bilan ta'minlanmasligi ishga aralashuvlar borligidan dalolat beradi.

"Himoya uchun advokat taqdim etilmasligi ana shunday ta'sir bilan bogʻliq boʻlishi mumkin. Ma'muriy huquqbuzarliklar toʻgʻrisidagi kodeks buzilgan. Ma'muriy huquqbuzarlik maqsadi boshqa yoʻl bilan ta'minlanmagan. Buni qanday va kim qilgan? Biz bu boʻyicha ham sudga murojaat qilamiz", deydi Davron Saidov.

Manba: Daryo.uz “Zamin” yangiliklarini “Telegram”da kuzatib boring