“Imkoniyatlar olami” markazi: Shavkat Mirziyoyev Andijonda ijtimoiy xizmatlar markazi bilan tanishdi

Prezident Shavkat Mirziyoyev Andijon shahrida tashkil etilgan “Imkoniyatlar olami” hududiy ijtimoiy xizmatlar markaziga tashrif buyurib, u yerda yaratilgan zamonaviy sharoitlar bilan tanishdi.

Ushbu markaz 2024 yil 27 fevralda qabul qilingan “Nogironligi bo‘lgan bolalarga ijtimoiy xizmat va yordam ko‘rsatish tizimini takomillashtirish” qarori ijrosi doirasida ilk bor tashkil etildi. 5 gektar maydonda joylashgan majmuada ma’muriy binolar, inklyuziv ta’lim va kasbga o‘rgatish kurslari, bolalar maydonchasi, sport majmuasi va suzish havzasi mavjud.

Markazda nogironligi bo‘lgan bolalar, yordamga muhtoj keksalar va kam ta’minlangan oilalar farzandlari uchun ijtimoiy, tibbiy, ta’lim va kasbga yo‘naltirish xizmatlari ko‘rsatiladi. Xususan, ingliz, rus, koreys tillari va IT yo‘nalishlarida ta’lim berish yo‘lga qo‘yilgan.

Prezident ilk bor tashkil etilgan “erta aralashuv” xizmati faoliyatini ham ko‘zdan kechirdi. Bu bo‘lim chaqaloqlikdan uch yoshgacha bo‘lgan bolalar va ularning onalari uchun mo‘ljallangan. Nogironlik xavfi aniqlangan bolalar bilan erta ishlash orqali ularga to‘g‘ri qaramlik va ta’lim asoslari qo‘yiladi.

Shuningdek, kunduzgi parvarish xizmati ham tashkil etilgan. Bu bolalar va kattalarning jismoniy va aqliy holatini mustahkamlashga, ularning yaqinlariga ishlash imkonini berishga qaratilgan. Markazda 60 nafardan ziyod mutaxassis ish olib bormoqda.

Markazdagi sport majmuasi zamonaviy jihozlar bilan ta’minlangan. AQSH va boshqa davlatlardan keltirilgan uskunalar asosida adaptiv sport turlari yo‘lga qo‘yilgan. Suv havzasi esa bolalar yoshi va ehtiyojlariga moslashtirilgan holda jihozlangan.

– Bu yetuk g‘amxo‘rlikning ifodasidir. Sizlardan sabr, ishonch va harakat talab etiladi. Biz bunday imkoniyatlarni yanada ko‘paytirishni davom ettiramiz, – dedi Prezidentimiz tashrif chog‘ida. “Zamin”ni Telegramʻda oʻqing!