Koreyaliklar yana 6 ta o‘zbek xizmat itini xarid qildi

Joriy yilning iyun oyida xalqaro hamkorlik doirasida yana bir muhim kelishuv amalga oshirildi — Janubiy Koreya mutaxassislari tomonidan O‘zbekistonda yetishtirilgan 6 bosh xizmat iti sotib olindi.

Ma’lumotlarga ko‘ra, Toshkentdagi Milliy kinologiya markazida maxsus tayyorgarlikdan o‘tkazilgan Jessi, Bella, Farona, Rada, Fayz va Fariz laqabli itlar yuborilishdan oldin barcha talablarga javob beradigan veterinar tekshiruvlardan o‘tkazildi. Ular xalqaro tashish uchun zarur bo‘lgan hujjatlar bilan rasmiy ravishda Toshkent xalqaro aeroporti orqali Koreyaga yuborildi.

Koreyalik bojxona xizmatlari bu itlarni qabul qilib oldi va hozirda ularning yangi iqlimga moslashuv jarayoni davom etmoqda. Moslashish yakuniga yetgach, ushbu itlar mamlakat xavfsizligi uchun xizmatga jo‘natiladi. Aytish joizki, bu itlar giyohvandlik moddalari va kontrabandaga qarshi kurashishda samarali faoliyat olib boradi.

Bu nafaqat ikki davlat o‘rtasidagi ishonchli hamkorlikni ifodalaydi, balki O‘zbekistondagi kinologiya sohasidagi yutuqlarni ham namoyon etadi. Milliy kinologiya markazi tomonidan xalqaro standartlarga muvofiq yetishtirilayotgan itlar xorijda yuqori baholanayotgani — bu sohadagi katta salohiyatdan darak beradi.

Eslatib o‘tamiz, avvalroq Janubiy Koreya ushbu markazdan 3 bosh xizmat itini sotib olgan edi. Yangi yuborilgan 6 ta it ortidan, jami 12 ta o‘zbek iti Koreyada xizmat qilishga tayyor holga keldi.

Mamlakatimizda tayyorlanayotgan xizmat itlarining xalqaro bozordagi talab darajasi oshib borayotgani, bu yo‘nalishda yanada ko‘proq eksport shartnomalarining imzolanishiga asos bo‘ladi, degan umid bor. Milliy kinologiya markazining bu yo‘ldagi mehnati esa — mamlakatimiz nufuzini yanada oshirmoqda. “Zamin”ni Telegramʻda oʻqing!