Bolgariyaning Sozopol shahrida sodir bo‘lgan fojiali hodisa o‘zbek talabalari orasida chuqur qayg‘u uyg‘otdi. Ma’lumotlarga ko‘ra, 22 yoshli yigit dengizda cho‘kayotgan ukrainalik qizga yordam berishga uringan paytida kuchli to‘lqin ta’sirida o‘zi suv ichiga tortilib ketgan. Uning tanasi bahaybat qoyatoshlar orasiga qisilib qolgan va hozircha uni chiqarib olishning iloji yo‘q.
Voqea 7 avgust kuni sodir bo‘lgan. Kun.uz bilan bog‘langan vatandoshimiz aytishicha, yigit bir necha do‘sti bilan birga Sozopolda dam olayotgan paytda hodisa ro‘y bergan. Ular orasida o‘zbek, qirg‘iz va ukrainalik yoshlar ham bo‘lgan.
— “Men o‘sha payt ishda edim. Do‘stlarim xabar berishdi: u cho‘kayotgan qizlardan biriga yordam berish uchun suvga tashlangan. Ammo kuchli to‘lqin uni ham olib ketgan. Balki katta toshlarga urilib, hushini yo‘qotgan bo‘lishi mumkin”, — deydi u.
Shohidlarning so‘zlariga ko‘ra, yosh yigitning jasadi qoyalar orasiga tiqilib qolgan va o‘sha yerda to‘lqinlar shiddati juda yuqori bo‘lgan. Hodisadan so‘ng atrofdagi o‘zbeklar politsiya va qutqaruv xizmatlariga xabar berishgan. Ammo Bolgariya qutqaruvchilari bir necha soatdan keyin yetib kelgan va hozirgi sharoitda jasadni chiqarib bo‘lmasligini ma’lum qilishgan.
— “911 xizmatiga qo‘ng‘iroq qildik, lekin kechasi qidiruv amalga oshirib bo‘lmasligini aytishdi. Biz qirg‘iz birodarlarimiz bilan 9 soat davomida o‘zimiz qidirdik. Oxirida qoyalar ostida uning tanasi ko‘rindi, ammo toshlar juda katta va qimirlab turadi, to‘lqin ham kuchli. Biz eplay olmayapmiz”, — deb gapirdi yordamga jalb etilgan yigitlardan biri.
Mahalliy axborotlarga ko‘ra, suv tinchigandan keyingina uni olib chiqish imkoni paydo bo‘lishi mumkin. Hozir yosh o‘zbek talabalari davlat rahbariyati va diplomatik idoralardan yordam so‘ramoqda. Kun.uz bu haqda Tashqi ishlar vazirligiga so‘rov yo‘llagan.
Ma’lumot uchun, Bolgariyada O‘zbekiston elchixonasi yo‘q, biroq ushbu mamlakat bilan aloqalarni yurituvchi va u yerdagi vatandoshlar bilan ishlaydigan diplomatlar mavjud. Hozirda ularga vaziyat to‘liq yetkazilgan va zarur choralar ko‘rish masalasi ko‘rib chiqilmoqda.
Bu voqea yana bir bor hayotdagi eng qimmat narsa — insonning jasorati va fidoiyligi ekanini, ammo shiddatli tabiat oldida ehtiyot choralari ham o‘ta muhimligini eslatdi.
“Zamin”ni Telegramʻda oʻqing!
