7 sentyabr kuni Angren shahri hududidan o‘tuvchi A-373 “Toshkent–O‘sh” xalqaro avtomobil yo‘lida ko‘p mashina ishtirokida yo‘l-transport hodisasi yuz berdi. Ichki ishlar vazirligi ma’lumoticha, kuchli to‘qnashuv oqibatida yetti nafar fuqaro voqea joyida halok bo‘ldi.
Ma’lum bo‘lishicha, 1981 yilda tug‘ilgan haydovchi A.R. boshqaruvidagi sement tashuvchi Shacman yuk avtomashinasi (2020 yilda ishlab chiqarilgan, haydovchining 15 yillik tajribasi bor) yo‘lda boshqaruvni yo‘qotgan. Natijada transport vositasi temiryo‘l kesishmasida to‘xtab turgan ikkita yuk mashinasi va beshta yengil avtomobil bilan qat’iy to‘qnashgan.
To‘qnashuv oqibatida kuchli yong‘in kelib chiqqan. Ammo hodisa joyiga yetib kelgan maxsus xizmatlar harakatlari orqali yong‘in qisqa vaqt ichida bartaraf etilgan.
Rasmiy ma’lumotlarga ko‘ra, yetti kishi voqea joyida jon taslim qilgan, besh nafar fuqaro og‘ir tan jarohatlari bilan shifoxonaga olib ketilgan. Shuningdek, yana to‘rt kishiga tibbiy yordam ko‘rsatilib, ular uylariga javob berilgan.
Vaziyatning jiddiyligi sabab, hukumat komissiyasi tuzildi. Unga Bosh vazir o‘rinbosari Ochilboy Ramatov rahbarlik qilmoqda. Komissiya jabrlanuvchilar va ularning oilalariga zarur yordam ko‘rsatish, shuningdek, fojiaga olib kelgan shart-sharoitlarga huquqiy baho berish bilan shug‘ullanmoqda.
Mutasaddilar ta’kidlashicha, bu kabi holatlar yo‘lda eng kichik ehtiyotsizlik ham qanchalik og‘ir oqibatlarga olib kelishi mumkinligini yana bir bor eslatadi. Hozircha voqea tafsilotlari o‘rganilmoqda.
“Zamin”ni Telegramʻda oʻqing!
