Toshkent shahrida faoliyat yuritgan “Guangzhou Medical of China” klinikasi atrofidagi jinoyat ishi katta jamoatchilik e’tiboriga sabab bo‘ldi. Sud hujjatlariga ko‘ra, mazkur muassasada shifokor sifatida ishlab kelgan xitoylik ota-bola X.K. va X.F. minglab odamlarning ishonchini suiiste’mol qilib, turli dorilar va igna terapiya orqali bemorlarni davolashga va’da bergan.
Ma’lum qilinishicha, ular 2020 yildan 2022 yilga qadar Bektemir tumanida joylashgan “Guangzhou” klinikasiga murojaat qilgan bemorlarga tibbiy tekshiruv o‘tkazmasdan tashxis qo‘ygan. Har xil kasalliklardan tuzalish mumkinligini aytib, igna terapiyasi va “xitoy tabobati dorilari”ni taklif qilishgan. Aslida esa ular sifatsiz dorilarni qimmatbaho narxlarda sotib, bemorlardan tushgan mablag‘ni shaxsiy ehtiyojlariga ishlatib yuborishgan.
Sud jarayonida ma’lum bo‘lishicha, faqatgina G.X. ismli bir jabrlanuvchining o‘zi 2,5 million so‘mdan ortiq mablag‘dan ayrilgan. Uning so‘zlariga ko‘ra, tabib “10 kunlik davolash kursi” uchun 2,8 million so‘m talab qilgan, keyin esa chegirma qilib 2,5 million so‘mga rozi bo‘lgan. Biroq uch kunlik muolajadan so‘ng hech qanday ijobiy natija kuzatilmagan va bemor shifo topmasdan, aksincha, moddiy zararga uchragan.
Tergov ma’lumotlariga ko‘ra, jami 100 nafar bemor shunday usulda aldanib, turli miqdorda mablag‘ to‘lagan. Ayblanuvchilarning yonidan katta pul miqdori ham musodara qilingan.
61 yoshli X.K. va uning 31 yoshli o‘g‘li X.F. 2024 yilda Qozog‘istonda qo‘lga olinib, O‘zbekistonga ekstraditsiya qilingan. Bektemir tuman sudi ularni O‘zbekiston Jinoyat kodeksining 168-moddasi (firibgarlik) va 186-3-moddasi (sifatsiz dori vositalarini tarqatish) bo‘yicha aybli deb topdi.
Sud hukmiga ko‘ra, X.K. 33 million 210 ming so‘m, X.F. esa 30 million 240 ming so‘m miqdorida jarima to‘lashga mahkum etildi. Shuningdek, avvalroq musodara qilingan 381 million so‘m jabrlanuvchilar zararini qoplash uchun yo‘naltiriladi.
Mutaxassislar ta’kidlashicha, so‘nggi yillarda “muqobil tabobat” niqobi ostida faoliyat yuritayotgan shubhali shaxslar ko‘paymoqda. Ular odamlarning ishonchidan foydalanib, sog‘liq bilan bog‘liq jiddiy xavflarga sabab bo‘lishi mumkin. Shu bois aholi faqat rasmiy litsenziyaga ega tibbiy muassasalarga murojaat qilishi kerakligi uqtirilmoqda.
“Zamin”ni Telegramʻda oʻqing!
