Toshkent shahrida sodir bo‘lgan juda tahlikali voqea jamoatchilik e’tiborini tortdi. Yo‘l harakati xavfsizligi xodimini avtomobil kapoti ustida sudrab ketgan haydovchiga nisbatan jinoyat ishi qo‘zg‘atildi, deb xabar berdi Bosh prokuratura matbuot xizmati.
Ma’lum qilinishicha, hodisa vaqtida YPX inspektori haydovchini to‘xtatishga uringan, ammo u qonuniy talabni inkor etib, harakatni davom ettirgan va natijada xodimni bir necha metr masofagacha kapot ustida sudrab ketgan. Bu holat shohidlar tomonidan videoga olingandan so‘ng ijtimoiy tarmoqlarda keng muhokama qilindi.
Hodisadan so‘ng haydovchi qo‘lga olindi va unga nisbatan Jinoyat kodeksining 219-moddasi bo‘yicha — “Hokimiyat vakiliga yoki fuqaroviy burchini bajarayotgan shaxsga qarshilik ko‘rsatish” ayblovi ilgari surildi. Rasmiy ma’lumotga ko‘ra, gumonlanuvchi shaxs 2001-yilda tug‘ilgan bo‘lib, hozirda protsessual tartibda ushlangan. Tergov ishlari boshlangan.
Surishtiruvlar davomida haydovchining ilgari ham qoidabuzarliklarni ko‘p marta sodir etgani ma’lum bo‘ldi. Uning avtomashinasi orqali 144 marta yo‘l harakati qoidalari buzilgani aniqlangan. Shuningdek, 38 holat bo‘yicha jarimalarning muddati o‘tgan, 30 tasi esa Majburiy ijro byurosiga yuborilgani ma’lum qilingan.
Qoidabuzar haydovchining umumiy qarzdorligi 18 million 90 ming so‘mni tashkil etgan.
Hozirda tergov organlari voqeaning barcha holatlarini aniqlash ustida ish olib bormoqda. Ichki ishlar tizimi va prokuratura bu kabi holatlarga nisbatan keskin choralar ko‘rilishini ma’lum qilgan.
Yo‘ldagi intizomsizlik va qonunga bo‘ysunish madaniyati haqida yana bir bor o‘ylab ko‘rishga majbur etadigan holat — davlat inspektoriga nisbatan jismoniy xavf solish nafaqat ma’muriy, balki jinoiy javobgarlikni ham keltirib chiqarishi mumkin.
“Zamin”ni Telegramʻda oʻqing!
