Zo‘ravonlik qurbonlari uchun bepul kurslar boshlandi

O‘zbekiston poytaxtida zo‘ravonlik va ekspluatatsiya qurbonlariga yordam ko‘rsatish dasturi yo‘lga qo‘yildi. Bu tashabbus doirasida bepul huquqiy va psixologik maslahatlar beriladi, shuningdek, ikki oylik oshpazlik, bichish va tikish bo‘yicha o‘quv kurslari tashkil etiladi.

Kurslar ishtirokchilari uchun barcha zarur materiallar taqdim etiladi. Mazkur tashabbus Oliy Majlis huzuridagi Fuqarolik jamiyati institutlarini qo‘llab-quvvatlash jamoat fondi tomonidan o‘tkazilgan grantlar tanlovida g‘olib bo‘lgan «Odam savdosiga qarshi birdamlik» loyihasining bir qismi hisoblanadi.

Loyihaning ijrochisi Yangihayot tumani Ma’naviyat va ma’rifat markazi bo‘limidir. Kurslar auditoriyasi odam savdosi qurbonlari, zo‘ravonlik yoki majburiy nikohga duch kelgan ayollar, huquqlari poymol bo‘lgan mehnat migrantlari va kam ta’minlangan ayollardan iborat.

Bu qo‘llab-quvvatlash chorasi O‘zbekistonda ayollar huquqlarini himoya qilish choralari kuchaytirilayotgan bir paytda amalga oshirilmoqda. Bungacha, yuqori aholi zichligiga ega bo‘lgan Farg‘ona viloyatida gender zo‘ravonlik qurbonlari uchun boshpana ochilgandi.

Birlashgan Millatlar Tashkiloti tuzilmalari ayollarning iqtisodiy mustaqillikka erishishini zo‘ravonlik davrasidan chiqish va o‘z hayotini boshqarishning eng muhim vositalaridan biri sifatida tan olgan. “Zamin”ni Telegramʻda oʻqing!