Qamchiq dovonida kecha–kunduz hukm surayotgan yomg‘ir, qor va kuchli shamol haydovchilar uchun jiddiy sinovga aylandi. Muzlab qolgan yo‘l, ko‘rinmaslik va xavfli past-balandliklar ortidan ayrim transportlar yo‘lning o‘rtasida to‘xtab qoldi, ba’zi yo‘lovchilar esa murakkab holatga tushib, yordamga muhtoj bo‘lib qoldi.
Favqulodda vaziyatlar vazirligi axborotiga ko‘ra, qutqaruv otryadlari dovonda uzluksiz ish olib bormoqda. Ular yo‘lda qolib ketgan haydovchilar va yo‘lovchilarni xavfsiz joylarga evakuatsiya qilish, issiq ichimliklar bilan ta’minlash hamda zarur birlamchi yordam ko‘rsatishni tashkil etmoqda. Mamlakatning eng dolzarb trassalaridan biri hisoblangan Qamchiqda fuqarolar xavfsizligi birinchi o‘rinda turibdi.
Qor ko‘chkisi xavfi oshgani bois dovon orqali harakat vaqtincha to‘liq cheklandi. Mutasaddi idoralar yo‘l holatini doimiy monitoring qilib boryapti. Tabiatdagi xavfli omillar bartaraf etilgandan so‘ng, harakat bosqichma-bosqich tiklanishi kutilyapti.
Mas’ullar aholidan ehtiyot bo‘lishni, zaruratsiz holda yo‘lga chiqmaslikni, ayniqsa, dovon orqali safarlarni vaqtincha ortga surishni tavsiya qilmoqda. Har qanday safar oldidan havo sharoiti va rasmiy axborot manbalarini kuzatib borish esa har bir fuqaro uchun juda muhim.
Ehtiyotsiz yo‘l tutish va ongli harakat – bugungi dovon sharoitida eng katta xavfsizlik kafolati.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
