Hech bir ayolning huquqlari shariatni bahona qilib cheklanishi mumkin emas. Chunki din insonni qo‘rqitish yoki bo‘ysundirish vositasiga aylana boshlagan zahoti, u o‘z mohiyatidan uzoqlashadi. Agar din zulmni oqlash quroliga aylansa, aynan shu holatning o‘zi dinni to‘g‘ri tushunish va qayta tartibga solish zarurligini ko‘rsatadi.
Islom dini o‘z aslida insonni ma’naviy kamolotga yetaklovchi, uni iymon-e’tiqod, insof va adolatga chorlovchi tolerantlik dinidir. U inson qadrini, uning sha’ni va huquqini ulug‘laydi. Ammo afsuski, aynan islom nomi ortida sun’iy ravishda shakllantirilgan ayrim diniy oqimlar va aqidaparast qarashlar ayolni shaxs sifatida qabul qilmaslikka urinib kelmoqda.
Bunday yondashuvlar ayolni jim turishga, shaxsiy hayoti haqida qaror qabul qilmaslikka, jamiyat ishlaridan chetda qolishga majburlaydi. Bu esa nafaqat inson huquqlariga, balki islomning mohiyatiga ham ochiq-oydin ziddir. Natijada, o‘zini musulmon deb bilgan jamiyat ichida ham chuqur ziddiyatlar va og‘riqli savollar paydo bo‘lmoqda.
XXI asrda yashayapmiz, ammo hali-hanuz ayol shariat nomi bilan chizilgan sun’iy qolip ichida qolishi kerakdek talqin qilinayotgani achinarli holat. Ayol — buyum emas. U tarbiyalanadigan, boshqariladigan obyekt ham emas. U mustaqil tafakkurga, bilimga, hayot uchun javobgarlikka ega to‘laqonli shaxs.
Bugun rivojlangan mamlakatlarda ayollar yirik bizneslarni boshqarmoqda, vazirliklar, parlamentlar va hatto prezidentlik lavozimlarida davlat taqdirini hal etmoqda. Shunday bir zamonda ayrim jamiyatlarda ayollarni hijob yoki niqob ortiga majburiy ravishda “yashirish”, uning ovozini o‘chirishga urinishlar davom etayotgani haqiqatdan ham o‘ylantiruvchi holatdir.
Ochig‘ini tan olish kerak: ayol huquqlarini cheklash orqali din himoya qilinmaydi. Din adolat bilan, insof bilan, erkinlik va mas’uliyat uyg‘unligi bilan himoya qilinadi. Qachonki adolat ustuvor bo‘lsa, o‘sha joyda ham din, ham jamiyat yutadi.
Ayol erkin nafas ola olgan, o‘z fikrini ayta olgan, qaror qabul qilish huquqiga ega bo‘lgan mamlakatda iymon ham mustahkam bo‘ladi, taraqqiyot ham. Chunki haqiqiy din qo‘rquvda emas, ongli tanlovda, hurmat va adolatda yashaydi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
