Toshkentda yo‘l harakati qoidalarini buzgan va xavfli drift uyushtirgan haydovchi javobgarlikka tortildi. Bu haqda Podrobno.uz xabar beradi.
Internetda tarqalgan videoda VAZ-2107 avtomobili sirpanchiq yo‘lda aylanishi, unga arqon orqali ikki kishi bog‘langan holda improvizatsiya qilingan chanada harakatlanayotgani aks etgan. Hodisa 21 dekabr kuni kechasi sodir bo‘lgan.
Yo‘l harakati xavfsizligi xizmati matbuot xizmatining ma’lum qilishicha, haydovchi ushbu videoni o‘zi Instagram’ga joylashtirgan. Ammo bu xavfli o‘yin nazoratdan chiqib ketgan — drift paytida avtomobilga bog‘langan ekstremallardan biri muvozanatni yo‘qotib, panjaraga urilgan va ariqqa tushib ketgan, ikkinchisi esa yo‘lning o‘rtasida ag‘darilib ketgan.
Haydovchiga nisbatan yo‘l qoidabuzarligi bo‘yicha ma’muriy bayonnoma tuzildi. Ushbu qoidabuzarlik uchun 25 bazaviy hisoblash miqdorida (taxminan 21,5 million so‘m) jarima va haydovchilik huquqidan bir yildan ikki yilgacha mahrum qilish jazosi belgilangan.
Huquqni muhofaza qilish organlari tomonidan e’lon qilingan videoda qoidabuzar o‘z xatosini tan olib, bunday harakatlarni takrorlamaslikka va’da bergan. Bungacha Samarqandda ham shunga o‘xshash holat kuzatilgan edi.
"Jiguli" haydovchisi xavfli manevrlar qilib, boshqaruvni yo‘qotgan va avtomobilni yo‘l chetiga chiqarib yuborgan. Hodisa oqibatida avariya sodir bo‘lmagan.
Avtomobil jarima maydonchasiga joylashtirilib, qoidabuzarlik bo‘yicha bayonnoma sudga yuborilgan.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
