Ohangaron shahrida jamoatchilikni larzaga solgan jinoyat ishi bo‘yicha sud qarori e’lon qilindi. Manzil koloniyasidan qochib, voyaga yetmagan qizga nisbatan jinsiy jinoyat sodir etgan shaxsga nisbatan qonun doirasida qattiq jazo tayinlandi.
Oliy sud matbuot kotibi Aziz Abidov ma’lum qilishicha, Jinoyat ishlari bo‘yicha Ohangaron shahar sudida 1994 yilda tug‘ilgan M.T.ga oid ish ko‘rib chiqilib, sud jarayoni yakunlangan. Jabrlanuvchining yoshi va ishning og‘ir xususiyati inobatga olinib, muhokama qonun talablariga muvofiq yopiq sud majlisida o‘tkazilgan.
Sud hukmiga ko‘ra, ayblanuvchi 2016 yilda tug‘ilgan, 3-sinfda tahsil oluvchi qizga nisbatan zo‘rlik ishlatib jinsiy jinoyat sodir etganlikda aybdor deb topildi. Uning harakatlari Jinoyat kodeksining 119-moddasi 4-qismi bilan kvalifikatsiya qilinib, 18 yil muddatga ozodlikdan mahrum qilish jazosi tayinlandi.
Shuningdek, sud qaroriga asosan M.T. o‘ta xavfli retsidivist deb e’tirof etildi. Belgilangan jazoning dastlabki ikki yilini turmada, qolgan qismini esa maxsus tartibli koloniyada o‘tashi belgilandi.
Ma’lumotlarga ko‘ra, mazkur shaxs Ohangaron tumanidagi 50-son manzil koloniyasida jazo o‘tayotgan vaqtida, foydali mehnatga jalb etilgan paytda qochib ketgan. Oradan ko‘p o‘tmay, u og‘ir jinoyat sodir etgani gumoni bilan shu kuniyoq qo‘lga olingan va unga nisbatan qamoq ehtiyot chorasi qo‘llangan.
Sud hukmi hozircha qonuniy kuchga kirmagan. Taraflar belgilangan muddatda Toshkent viloyati sudiga apellyatsiya yoki kassatsiya shikoyati berish huquqiga ega.
Bu qaror jamiyatda voyaga yetmaganlarni himoya qilish masalasida qonunning mustahkam pozitsiyasini yana bir bor namoyon etdi.
“Zamin”ni Telegramʻda oʻqing!
