Toshkent shahrida pulli to‘xtab turish joylaridan foydalanish tartibiga muhim yangilik kiritilmoqda. Endi rezidentlar, ya’ni belgilangan hududda doimiy yashovchi fuqarolar uchun maxsus avtoturargoh ruxsatnomalari amaliyotga joriy etiladi. Bu haqda Shavkat Umrzoqov imzolagan qarorda ma’lum qilindi.
Qaror 2025 yil 25 dekabr kuni rasman e’lon qilingan bo‘lib, unga ko‘ra har bir turarjoy manzili bo‘yicha ko‘pi bilan ikkita rezident avtoturargoh ruxsatnomasini ro‘yxatdan o‘tkazish mumkin bo‘ladi. Bu cheklov avtoturargohlardagi tartibni saqlash va ortiqcha yuklamani oldini olishga qaratilgan.
Yangi tartibga asosan, rezidentlar uchun soat 20:00 dan 08:00 gacha bo‘lgan vaqt oralig‘ida to‘xtab turish mutlaqo bepul bo‘ladi. Kunduzgi soatlarda esa avtoturargohlardan foydalanish belgilangan tariflar asosida to‘lanadi.
Ruxsatnoma bir yil muddatga beriladi. Yillik rezidentlik ruxsatnomasi uchun bir BHM miqdorida, ya’ni hozirgi hisob-kitobga ko‘ra 412 ming so‘m to‘lov amalga oshirilishi lozim bo‘ladi. Bu to‘lov orqali fuqarolar o‘z yashash manzili yaqinida qonuniy va kafolatli to‘xtab turish imkoniyatiga ega bo‘ladi.
Ma’lum qilinishicha, ushbu qaror 2026 yil 1 fevraldan rasman kuchga kiradi. Shu sanadan boshlab Toshkent shahrida pulli avtoturargohlardan foydalanishda rezidentlik tizimi to‘liq ishga tushiriladi.
Yangi qoidalar poytaxtda transport harakatini tartibga solish, aholi uchun qulaylik yaratish va avtoturargohlardan samarali foydalanishga xizmat qilishi kutilmoqda. Muxlislar va haydovchilar esa bu o‘zgarishlarni shahar hayotidagi yana bir amaliy qadam sifatida baholamoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
