Ishoning, uyingizda “begona propiska” turib qolgani yoki manzil ma’lumotlarida xatolar chiqib ketgani — ko‘pchilikning asabini yeydigan klassik muammo. Endi esa bunaqa “qayta-qayta IIBga borib yurish” ssenariyi sekin-asta tarixga aylanyapti.
2026 yil 1 martdan boshlab fuqarolar yashash joyi bo‘yicha ro‘yxat (propiska) ma’lumotlaridagi xatolarni onlayn tarzda to‘g‘rilash imkoniyatiga ega bo‘ladi. Bu tartib 30 yanvar kuni imzolangan Hukumat qarori bilan joriy etilmoqda.
Yangi tartibga ko‘ra, Yagona interaktiv davlat xizmatlari portali orqali:
— uy manzilingizda ro‘yxatda turgan shaxslar haqidagi ma’lumotlarni tekshirish;
— noto‘g‘ri kiritilgan ma’lumotlarni to‘g‘rilash;
— manzilga bog‘liq xatolarni tezkor bartaraf etish mumkin bo‘ladi.
Eng muhimi — buning uchun Ichki ishlar organlariga shaxsan borib, navbat kutib, “endi anavi kabinetga” degan kvestdan o‘tish talab etilmaydi. Ha, nervni asraydi.
Tekshiruvlar ham qo‘lbola emas: murojaatlar avtomatik ravishda davlat axborot tizimlari orqali ko‘rib chiqiladi. Jumladan, “Manzil” axborot tizimi, IIV ma’lumotlar bazalari, sud qarorlari, mahalla ma’lumotlari, FHDYO yagona elektron arxivi hamda kadastr axborotlari o‘zaro bog‘lanadi. Shu bois aksariyat holatlarda so‘rov real vaqtda hal bo‘ladi, ayrim vaziyatlarda esa bir ish kuni ichida javob beriladi.
Xizmat bepul. Yakunda fuqaroga QR-kodli Qayd varag‘i yoki manzil bo‘yicha ro‘yxatdan o‘tgan shaxslar haqida ma’lumotnoma taqdim etiladi.
Xulosa oddiy: kim uyida kim “propiska”da turganini aniq bilmoqchi bo‘lsa — endi bu ishni smartfon bilan ham qilib qo‘yadi. Qog‘ozbozlik kamaysa, hayotga havo kirib, nervlar ham rahmat aytadi.
“Zamin”ni Telegramʻda oʻqing!
