11:10 / 09.01.2015
10 913

O‘zbekistonda notariuslar mijozlarni oldindan ro‘yxatga olingan tartibda va navbat bilan qabul qilishadi

O‘zbekistonda notariuslar mijozlarni oldindan ro‘yxatga olingan tartibda va navbat bilan qabul qilishadi
Endilikda jismoniy va yuridik shaxslar notarius bilan o‘zlariga qulay va oldindan kelishilgan vaqtda uchrashishni telefon, yozma yoki elektron shaklda (shu jumladan, Yagona interaktiv davlat xizmatlari portali orqali) belgilash huquqiga ega bo‘ldilar. Bu haqda “gazeta.uz”ga asoslanib “Kun.uz” xabar bermoqda.

Tegishli me’yorlar Adliya vazirining 2014 yil 30 dekabrdagi buyrug‘i bilan tasdiqlangan “Jismoniy va yuridik shaxslarning murojaatlarini davlat notarial idoralarida navbati bilan ro‘yxatga olish tartibi haqidagi” qoidada nazarda tutilgan. Buyruqda bu yangilik oldiga notarial idoralarda xizmat ko‘rsatish sifatini oshirish hamda jismoniy va yuridik shaxslar uchun qo‘shimcha qulaylik yaratish vazifasi qo‘yilganligi ta’kidlab o‘tilgan.

Norma.uz`ning ta’kidlashicha, endilikda notarial idoralar barcha murojaatlarni “Notarial harakatlarni amalga oshirish haqidagi murojaatlarni navbati bilan qayd etish jurnalida” qayd etishlari va ularni mavjud notariuslar orasida teng taqsimlashlari lozim.

Notarial idoralarning ish kunlari va ishlash vaqti shanba va yakshanba kunlarini ham hisobga olgan holda hududiy adliya idoralari tomonidan belgilanadi (notarial xizmat Qoraqalpog‘iston va viloyat tarkibidagi bo‘lgan tumanlarda faqat bitta notarius tomonidan amalga oshirilayotgan holatlar bundan mustasno).

Jurnal murojaatlarni ro‘yxatga oluvchi va murojaat etuvchiga qulay bo‘lgan kun va vaqtga tashrifni belgilovchi notarius yordamchisi tomonidan yuritiladi (murojaat etuvchi istagi bilan u ro‘yxatga olinganlik haqida xabar olishi mumkin. Yangi qoidaga ko‘ra, mijoz notarius tomonidan murojaat kelib tushgan kundan keyingi ish kunidan kech bo‘lmagan vaqtda qabul qilinishi lozim).

Agar mijoz belgilangan vaqtda notarius huzuriga kelmasa, uning tashrifi umumiy tartibda yoki boshqa vaqtga ko‘chirilishi bilan amalga oshiriladi. Belgilangan vaqtni boshqa odamga berish taqiqlanadi.

Agar tashrif chog‘ida notarius tomonidan notarial harakatlarni amalga oshirishga to‘sqinlik qiluvchi kamchiliklar aniqlansa, ularni zudlik bilan bartaraf etish bo‘yicha choralar ko‘riladi. Buni amalga oshirishning iloji bo‘lmaganida, murojaat etgan shaxsga kamchiliklarni bartaraf etish uchun etarli vaqt ajratiladi. Mijoz bu kamchiliklarni to‘ldirganidan so‘ng, notarius tomonidan navbatsiz tartibda qabul qilinadi.

Foto: belogorodka.info

Ctrl
Enter
Xato topdIngizmi?
Iborani ajratib Ctrl+Enter tugmasini bosing
Fikrlar (0)


Yangiliklar » Jamiyat » O‘zbekistonda notariuslar mijozlarni oldindan ro‘yxatga olingan tartibda va navbat bilan qabul qilishadi
[/banner_pushhouse