Saida Mirziyoyeva: “Maktab internat o‘quvchilari nihoyatda iqtidorli, san’at va adabiyotga oshufta ekaniga ishonch hosil qildik.“

Xabaringiz bor, O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligining “Ko‘ngil ko‘zi” loyihasi doirasida, Yangi yil bayrami arafasida “Sovg‘alar karvoni” xayriya aksiyasi boshlandi.

12 ta mashinadan iborat karvon yurtimizning barcha 12 ta hududidagi ko‘rishda nuqsoni bo‘lgan bolalar maktab-internatlariga sovg‘alarni yetkazmoqda.

Buning natijasida har bir internat zamonaviy sport anjomlari, turli musiqa asboblari va Brayl alifbosida chop etilgan ko‘plab bosma hamda audio kitoblarga ega bo‘ladi.

Kecha ana shunday xayrli aksiya Farg‘ona viloyatiga ham yetib bordi.

“Bugun kechki ovqatni Farg‘onadagi 45-sonli maxsus maktab internati o‘quvchilari bilan birga qildik, — dedi AOKA direktori o‘rinbosari, loyiha rahbari Saida Mirziyoyeva. — “Ko‘ngil ko‘zi” loyihasi doirasida aynan Farg‘onaga kelishimizning sababi — Agentligimizga farg‘onalik ko‘plab bolalar murojaat qilgan va biz bilan uchrashish istagini bildirgan edi.

Maktab internat o‘quvchilari nihoyatda iqtidorli, san’at va adabiyotga oshufta ekaniga ishonch hosil qildik.

Uchrashuv iliq taassurotlarga boy bo‘ldi. She’rlar aytildi, qo‘shiqlar kuylandi. Orzular haqida, kelgusi rejalar haqida suhbatlashdik.

Loyihamiz doirasida bunday uchrashuvlarni yana davom ettiramiz”.
“Zamin”ni Telegramʻda oʻqing!