Brakonerlar «Qizil kitob»ga kiritilgan 14 ta kiyik va 5 ta yovvoyi quyonni otib o‘ldirdi

Qoraqalpog‘istonning Taxtako‘pir tumanida xizmat olib borayotgan xodimlar 12 dekabr kuni «Qo‘ng‘irotko‘l» ovuli atrofidagi cho‘l hududida 14 ta kiyikni otib o‘ldirib, go‘shtini bo‘laklayotgan brakonerlarni aniqladi. Bu haqda Davlat ekologiya qo‘mitasi xabar qildi.

Ma’lum qilinishicha, noqonuniy ovchilar ekologiya nazorat inspeksiyasi xodimlari kelayotganini ko‘rib, otilgan hayvonlar, kiyim-kechak, oziq-ovqat, yoqilg‘i, o‘q-aslahalarini tashlab, noma’lum yo‘nalishda davlat raqamisiz UAZ avtomobilida qochib ketgan. Inspektorlar taxminan 5 kilometr masofagacha ularning izidan borgan, ammo ushlash imkoni bo‘lmagan.

^{Foto: Qoraqalpog‘iston ekologiya qo‘mitasi}
Qayd etilishicha, voqea joyi ko‘zdan kechirilganda otilgan patron gilzasi, idish-tovoq, xo‘jalik buyumlari bo‘lgan pichoq, bolta, yoqilg‘i, kiyim-boshlar hamda «Qizil kitob»ga kiritilgan 14 dona jayron, 5 dona yovvoyi quyon tashlab ketilgani ma’lum bo‘lgan.

Ta’kidlanishicha, ular qoldirgan ashyolar ichidan M.M. nomiga xorijdan T.M. ismli shaxsdan 12 oktabr kuni chet el valyutasida pul o‘tkazganini tasdiqlovchi kvitansiya ham topilgan.

^{Foto: Davlat ekologiya qo‘mitasi}
Davlat inspektorlari tomonidan ushbu holat yuzasidan tegishli tartibda dalolatnoma tuzilib, voqea joyi video tasvirga olingan. Ayni paytda huquqni muhofaza qilish organlari tomonidan brakonerlarni qo‘lga olish chora-tadbirlari amalga oshirilmoqda.

^{Foto: Davlat ekologiya qo‘mitasi}
«Hozirda mazkur holat yuzasidan Orol tabiatni muhofaza qilish prokuraturasi tomonidan tergovga qadar tekshirish harakatlari olib borilmoqda», — deyiladi xabarda. “Zamin” yangiliklarini “Telegram”da kuzatib boring