Qashqadaryo hokimi mahallasida ajrim kuzatilmagan raislarga 10 mln so‘m mukofot va’da qildi

Qashqadaryo viloyati hokimi Murodjon Azimov mahallasida oilaviy ajrim kuzatilmagan mahalla raislarini 10 million so‘mgacha pul mukofoti berilishi va eng yaxshi sihatgohda bepul davolanishini ma’lum qildi. Bu haqda Murodjon Azimovning 2021 yilgi ijtimoiy-iqtisodiy rivojlanish yakunlari hamda 2022 yil uchun belgilangan vazifalar yuzasidan aholiga murojaatnomasida aytib o‘tildi, deya xabar berdi «Daryo».

Qayd etilishicha, viloyat rahbari Qashqadaryo oilaviy ajrimlar ko‘rsatkichi bo‘yicha respublikada yuqori o‘rinda turishini aytib, «Har bir oila ajrimi nafaqat ikki kishining, balki ularning barcha yaqinlari qalbida unutilmas iztirob va armon bo‘lib qoladi. Ajrashgan oilalar jamiyatimizning singan bo‘laklaridir», — degan.

Murodjon Azimov Qashqadaryoda 2022 yilda 200 ta mahallada yoshlar uchun zamonaviy maydonchalar tashkil etilishini, mahallalarda oilaviy ajrimlarning oldini olish uchun shaxsan o‘zi bu masalaga e’tibor qaratishini ta’kidlagan.

«Yangi yil yakunida ajrimlar sodir etilmagan har bir raisga mahalliy budjetdan 5 million so‘mdan 10 million so‘mgacha pul mukofoti joriy qilsak, menimcha, viloyat moliya boshqarmasi va deputatlar bu taklifimizni qo‘llab-quvvatlaydi», — degan viloyat hokimi.

U taklifni Kasaba uyushmalari federatsiyasi raisi Qudratilla Rafiqov hamda Mahalla va oilani qo‘llab-quvvatlash vaziri Rahmat Mamatovlar ham qo‘llab-quvvatlaganini bildirgan.

«2022 yilda biz siz bilan Qashqadaryoda oilaviy ajrimlarga keskin qarshimiz degan kompaniyani boshlaymiz», — degan Murodjon Azimov.

Eslatib o‘tamiz, Qashqadaryo viloyati hokimi aholiga qilgan murojaatida Qashqadaryolik faol jurnalist va blogerlar xorijda malaka oshirishini ma’lum qilgandi. Shuningdek, u Qarshidagi xaroba yotoqxona haqida gapirgan. “Zamin” yangiliklarini “Vkontakti”da kuzatib boring