«Mashinani ustiga haydayapti...» — Prezident YHX inspektorlari faoliyatiga ko‘rsatilayotgan qarshiliklar haqida

Shavkat Mirziyoyev 11 fevral kuni o‘tkazilgan videoselektor yig‘ilishida yo‘l harakati xavfsizligi inspektorlari faoliyatiga qarshilik ko‘rsatish muammosiga alohida e’tibor qaratdi.

«So‘nggi paytlarda yo‘l harakati xavfsizligi inspektori faoliyatiga qarshilik ko‘rsatish masalasi... Mana ko‘p joylarda, internetda ham chiqib ketyapti, uryapti, so‘kyapti, haqorat qilyapti. Qonun yo‘q. U qanday, bechora inspektor nima qilishi kerak?

Mashinani ustiga haydayapti... Bungayam misollar bo‘lgan O‘zbekiston sharoitida. Yo‘q, birorta odam, birorta deputat menga «janob prezident, buni o‘zgartiraylik, bu adolatsizlik bo‘lyapti», degani yo‘q.

Erkinlikning ham me’yori bo‘ladi. Erkinlik degani qonunni hurmat qilish degani. Shuning uchun inspektor faoliyatiga qarshilik ko‘rsatish, ularni obro‘sizlantirish holatlari ko‘paymoqda. Qonunlarni ko‘rib chiqishda bu masalaga ham alohida e’tibor qaratish zarur», — degan davlat rahbari. “Zamin” yangiliklarini “Vkontakti”da kuzatib boring