«Suv ustozim Jahongir Ortiqxo‘jayevning qiziga tegishli». Murod Nazarov oltin zarrali Ocard suvi haqida (video)

Biznesmen, Murad Buildings kompaniyasi asoschisi Murod Nazarov Shoira Mirsodiqovaga bergan intervyusida oltin zarrasi qo‘shilgan Ocard suv brendi Toshkent shahar hokimi Jahongir Ortiqxo‘jayevning qiziga tegishli ekanini aytdi.

Ma’lumot uchun, Murod Nazarov Ocard suviga olingan reklama roligida Jeyms Bond rolini ijro etgan.

Shoira Mirsodiqova tadbirkorga «Ocard uchun reklamaga tushdingiz. Suv o‘zingiznikimi?», deya savol bergan. Murod Nazarov savolga javoban quyidagi so‘zlarni keltirgan:

«Yo‘q-yo‘q, suv ustozimiz Jahongir Ortiqxo‘jayevning qizlariniki. Suratga olish ishlari qiziq jarayon bo‘lgan.

Ko‘p joylardan reklamaga taklif qilishadi, qaramayman, biz aktyor, reklama agentligi emasmiz. Jeyms Bond roligini olishdan ikki oy oldin bir xorijiy, juda jiddiy kompaniyadan taklif bo‘lgandi, bir kunlik tasvirga olish jarayonlari uchun 200 ming dollar beramiz, deyishgan. Rozi bo‘lmagandim.

Lekin Ocard suvi reklamasiga birgina telefon qo‘ng‘irog‘ida rozi bo‘lganman. Chunki Jahongir akadan yomon g‘oya chiqmaydi. O‘shanda ustoz kechasi soat 23:30 larda telefon qilib qoldilar, tinchlikmikan, deb go‘shakni ko‘tarsam, menga qarang, bitta zo‘r g‘oya bor, sizga mo‘ljallab qilinadi. Jeyms Bond bo‘lgingiz keladimi? Parashyutdan sakrashni eplaysizmi, dedilar. Men rozi bo‘ldim.

Tekinga o‘ynab berganman, o‘zimga yoqqani uchun. Ikki kun vaqtimiz ketgan. Hammayog‘im qonab, ko‘karib ketgandi. Kaskadyorlardan foydalanmadik, o‘zim qildim hammasini. Bir hafta qonab yurdi, aktyorlarga ham oson emas ekan (kuladi)». “Zamin” yangiliklarini “Telegram”da kuzatib boring