Rossiyaning ikki aviakompaniyasi Oʻzbekistonga parvozlarini bekor qildi

Rossiya Federatsiyasining Smartavia va iFly aviakompaniyalarining Oʻzbekistonga amalga oshiriladigan parvozlari vaqtincha bekor qilindi. Bu haqda Fuqaro aviatsiyasi agentligi xabar qildi.

Qayd etilishicha, ikki aviakompaniya Oʻzbekiston fuqaro aviatsiyasi aerodromlariga bir martalik parvozni amalga oshirish uchun ruxsatnomalarga ega. Ammo Smartavia aviakompaniyasi 7 mart kuniga rejalashtirilgan Moskva—Urganch—Moskva yoʻnalishidagi parvoz bajarilmasligi yuzasidan rasmiy ma'lumot berdi.

Shuningdek, iFly aviakompaniyasi 5 mart sanasidan boshlab Oʻzbekistonga bajarilishi kutilayotgan hamda barcha rejalashtirilgan yoʻnalishlarda oʻz parvozlarini noma'lum muddatga toʻxtatdi. Aviakompaniya bu haqdagi rasmiy ma'lumotni Oʻzbekiston aviatsiya ma'muriyatiga taqdim etdi.

«Bekor boʻlgan aviaqatnovlar yoʻlovchilari aviachipta pullarini qaytarish yoki chiptalarini boshqa muddatga qayta bronlash masalalari yuzasidan ushbu chiptalarni xarid qilgan aviakassalarga murojaat etishlari tavsiya etiladi», — deyiladi xabarda.

Eslatib oʻtamiz, 24 fevralga oʻtar kechasi Rossiya prezidenti Vladimir Putin Donbassda «mintaqa aholisini genotsiddan himoya qilish» uchun «maxsus harbiy operatsiya» boshlanganini e'lon qildi. Shundan soʻng AQSh prezidenti Jo Bayden Rossiyaga nisbatan yangi sanktsiyalar joriy qilgan. 27 fevral kuni 20 ta davlat Rossiya samolyotlari uchun oʻz havo hududini yopishini e'lon qildi. Boeing Rossiya aviakompaniyalariga ehtiyot qismlar etkazib berish va texnik xizmat koʻrsatishni toʻxtatdi.

Shundan soʻng Rossiya ham bir qator davlatlar uchun havo hududini yopdi, bir qator aviaqatnovlar bekor qilindi. Jumladan, Rossiyaning S7 Airlines kompaniyasi Oʻzbekistonga barcha reyslarni may oyigacha bekor qildi.

Uzbekistan Airways esa Rossiya havo hududining bir qismi yopilishi bilan bogʻliq cheklov sabab bir qator shaharlarga parvozlar jadvali va yoʻnalishini oʻzgartirdi. Unga koʻra, 3 martdan 26 martgacha Oʻzbekiston—Sochi—Oʻzbekiston yoʻnalishida qoʻshimcha qatnovlar joriy etilib, Krasnodar va Rostov-Don shaharlariga rejalashtirilgan parvozlar Sochi shahriga amalga oshiriladi. “Zamin” yangiliklarini “Telegram”da kuzatib boring