Buxoroda 500 yillik «Talipoch qal'a darvozasi»ning qal'a devori oʻpirilib tushdi

^{Foto: Buxoro viloyat madaniy meroc boshqarmasi matbuot xizmati}
Buxoro shahrida 11 mart kuni kechki payt hafta davomida muttasil yogʻgan yomgʻir oqibatida «Talipoch qal'a darvozasi» chap tomonidagi qal'a devorining bir qismi qulab tushdi. Bu haqda Madaniy meros agentligi xabar qildi.

Qayd etilishicha, 12 mart kuni Buxoro viloyat hokimligi, viloyat Madaniy meros va favqulodda vaziyatlar boshqarmalari, Buxoro mintaqaviy restavratsiya markazi mas'ul xodimlari va maxsus eskspertlaridan iborat jamoatchilik ilmiy maslahat kengashi a'zolari hodisa joyida oʻrganish ishlarini olib borgan.

XVI asrga tegishli «Talipoch qal'a darvozasi» 2003 yilda qayta tiklangan. Oʻtgan yillar davomida qal'a atrofidagi devorning chap qanoti ortidagi madaniy qatlamlarning choʻkishi, qoplama devorlarida yoriqlar paydo boʻlishi hamda mart oyida kuzatilgan doimiy yogʻingarchilik devorning choʻkishi va qulab tushishiga olib kelgani aniqlangan.

^{Foto: Buxoro viloyat madaniy meroc boshqarmasi matbuot xizmati}
Ta'kidlanishicha, «Talipoch qal'a darvozasi» 2022 yil davomida asrashga doir ishlar amalga oshiriladigan moddiy madaniy meros koʻchmas mulk ob'ektlarining manzilli roʻyxatiga kiritilgan.

Hozirda soha mutasaddilari va mutaxassislar tomonidan mazkur ob'ektning atrofini oʻrab olish, mazkur huddudda yashovchi fuqarolar va ob'ektga tashrif buyuruvchi sayyohlar xavfsizligini ta'minlash choralari koʻrilgan. Shuningdek, Buxoro viloyati Madaniy meros boshqarmasi va ekspertlar tomonidan ob'ektning texnik holati oʻrganilib va uni tezkorlik bilan qayta tiklash choralarini koʻrish boʻyicha muhokamalar olib borilgan.

Madaniy meros agentligi ob'ektda 2003 yilda restavratsiya ishlari amalga oshirilgan boʻlsa-da, shoshma-shosharlikka yoʻl qoʻyilgani, ta'mirlash ishlari malakali ustalar tomonidan olib borilmagani oʻz ta'sirini koʻrsatganini bildirgan.

^{Foto: Buxoro viloyat madaniy meroc boshqarmasi matbuot xizmati}
«Endilikda bu kabi kamchiliklarni oldini olish maqsadida Turizm va madaniy meros vazirligi huzuridagi Madaniy meros agentligi tomonidan madaniy meros ob'ektlarini restavratsiya ishlarini puxta oʻylangan reja asosida, malakali mutaxassislar ishtirokida amalga oshirish choralari koʻrilmoqda», — deyiladi xabarda. “Zamin” yangiliklarini “Telegram”da kuzatib boring