O‘zbekiston Prezidenti Administratsiyasi rahbari Saida Mirziyoyeva Italiyada, 61-Venetsiya biyennalesi doirasida tashkil etilgan o‘zbekistonlik rassom Vyacheslav Axunovning shaxsiy ko‘rgazmasi ochilishida ishtirok etdi. “Instruments of the Mind” — “Tafakkur vositalari” deb nomlangan ushbu ko‘rgazma Venetsiyadagi Palazzo Franchetti saroyida namoyish etilmoqda.
Mazkur tadbir O‘zbekiston zamonaviy san’ati uchun muhim voqealardan biri bo‘ldi. Chunki Venetsiya biyennalesi dunyo san’at maydonida eng nufuzli va ta’sirli platformalardan biri hisoblanadi. Bunday maydonda o‘zbekistonlik rassom ijodining keng namoyish etilishi milliy badiiy maktabimizning xalqaro e’tibori ortib borayotganini ko‘rsatadi.
Saida Mirziyoyeva o‘zining Telegram kanalida Vyacheslav Axunovni konseptual san’atning yetakchi namoyandalaridan biri sifatida ta’rifladi. Uning ta’kidlashicha, ushbu ko‘rgazma rassomning fikrlash doirasi, tasavvur kengligi va san’at orqali murakkab g‘oyalarni ifoda etish qobiliyatini yaqqol namoyon qiladi.
“Axunov konseptual san’atning yetakchi namoyandalaridan biridir. Ushbu ko‘rgazma uning fikr va tasavvur ko‘lami naqadar keng ekanini yaqqol namoyon etadi”, — deb yozdi Saida Mirziyoyeva.
Qayd etilishicha, “Tafakkur vositalari” loyihasi rassom ijodining qariyb yarim asrlik davrini qamrab olgan. Ekspozitsiyadan Vyacheslav Axunovning turli yillarda yaratgan asarlari, jumladan, 1970 yillarga oid, shu vaqtga qadar keng ommaga namoyish etilmagan noyob ishlari ham o‘rin olgan.
Bu jihat ko‘rgazmaning qiymatini yanada oshiradi. Chunki tomoshabinlar bir rassom ijodining faqat ayrim bosqichlarini emas, balki yarim asrga yaqin davom etgan badiiy izlanishlari, fikriy o‘zgarishlari va ijodiy yo‘lini yaxlit holda ko‘rish imkoniyatiga ega bo‘ladi.
Axunov ijodi oddiy tasvir yoki shakl bilan cheklanmaydi. Uning asarlarida fikr, ramz, xotira, ijtimoiy qarash va inson ongida kechadigan murakkab jarayonlar muhim o‘rin tutadi. Shu sabab “Tafakkur vositalari” nomi ham bejiz tanlanmagan. Bu ko‘rgazma san’atni faqat ko‘rish emas, uni o‘ylash, his qilish va qayta anglashga chorlaydi.
Saida Mirziyoyeva mazkur ko‘rgazmani O‘zbekistonning badiiy salohiyati jahon san’at maydonida munosib aks etayotganining yana bir yorqin dalili sifatida baholadi. Uning fikricha, zamonaviy san’at orqali O‘zbekiston dunyo bilan muloqot qilmoqda va ko‘plab insonlar qalbiga yetib bormoqda.
“Bu O‘zbekistonning badiiy salohiyati zamonaviy san’at vositasida jahon ahli bilan muloqot qilib, ko‘plab qalblarni zabt etayotganining yana bir yorqin isbotidir”, — deya fikrini yakunlagan Saida Mirziyoyeva.
Umuman olganda, Vyacheslav Axunovning Venetsiyadagi shaxsiy ko‘rgazmasi milliy san’atimiz uchun katta e’tirofdir. Bu nafaqat bir rassom ijodiga berilgan baho, balki O‘zbekiston madaniyati, ijodiy tafakkuri va zamonaviy san’atdagi o‘rniga qaratilgan e’tibor hamdir. San’at tilida aytilgan fikr ba’zan diplomatik nutqdan ham kuchliroq ta’sir qiladi — Venetsiyadagi ushbu ko‘rgazma aynan shuni isbotlamoqda.
“Zamin”ni Telegramʻda oʻqing! 
