So‘nggi yillarda koreys doramalari butun dunyoda katta trendga aylandi. Netflix, Disney+, Apple TV+ kabi yirik platformalar koreys seriallariga jiddiy sarmoya kirita boshlagach, mashhur aktyor va aktrisalarning gonorarlari ham rekord darajaga ko‘tarildi. Bugun ayrim koreys yulduzlari birgina epizod uchun yuz minglab dollar, ba’zilari esa million dollargacha haq olmoqda.
Bu ro‘yxatda eng ko‘p tilga olinadigan yulduzlardan biri Li Jon Je hisoblanadi. U “Kalmar o‘yini” serialidagi Son Gi Hun obrazi orqali dunyo miqyosida mashhurlikka erishdi. Ushbu loyiha aktyorni nafaqat Koreyada, balki Gollivud darajasida tanilgan yulduzga aylantirdi. Ma’lumotlarga ko‘ra, Li Jon Je “Kalmar o‘yini”ning keyingi mavsumlari uchun har bir epizoddan 700 ming dollardan 1 million dollargacha gonorar olgan.
Keyingi o‘rinda Pak Bo Gom turadi. U “Javob 1988” va “Oy nuridagi sevgi” kabi mashhur seriallari orqali tomoshabinlar qalbidan joy olgan. Aktyorning samimiy obrazi, tabiiy ijrosi va keng muxlislar auditoriyasi uni Koreyaning eng talabgir aktyorlaridan biriga aylantirdi. Pak Bo Gom bir epizod uchun taxminan 350 ming dollar atrofida haq olishi aytiladi.
Li Min Ho ham koreys doramalari tarixidagi eng mashhur aktyorlardan biri sanaladi. U “Guldan go‘zal yigitlar” serialidan keyin Hallyu — koreys to‘lqinining asosiy yulduzlaridan biriga aylandi. Bugungi kunda Li Min Ho bir epizod uchun o‘rtacha 200 ming dollar yoki undan yuqori gonorar oladigan aktyorlar qatorida tilga olinadi.
