Issiq to‘lqini yaqinlashmoqda: harorat +44° gacha ko‘tariladi

O‘zbekiston hududlariga jazirama issiqlar bosqichma-bosqich kirib kelmoqda. «O‘zgidromet» xizmati tomonidan tarqatilgan oxirgi ma’lumotlarga ko‘ra, 23 iyun, yakshanba kuni mamlakat bo‘ylab havo harorati keskin ko‘tarilishi kutilmoqda. Aynan haftaning boshida ayrim hududlarda sutkalik harorat +44°C darajagacha yetishi ehtimoldan xoli emas.

Toshkent shahrida ob-havo asosan kam bulutli bo‘lib, yomg‘ir yog‘ishi ehtimoli yo‘q. Poytaxt osmonida quyosh charaqlab turadi. Shamol esa sharqiy yo‘nalishdan, 3–8 m/s tezlikda esadi. Harorat kechasi +21…+23°, kunduzi esa +38…+40° atrofida bo‘ladi. Bu esa poytaxt aholisidan alohida ehtiyotkorlik talab etadi — suv iste’moli va soya joylarda qolish muhim ahamiyat kasb etadi.

Qoraqalpog‘iston va Xorazmda chang-to‘zon xavfi
Respublikaning shimoliy hududlari — Qoraqalpog‘iston Respublikasi va Xorazm viloyatida havo biroz bulutli va o‘zgaruvchan bo‘ladi. Yog‘ingarchilik kuzatilmaydi, biroq shamolning kuchayishi natijasida ba’zi joylarda chang-to‘zonlar paydo bo‘lishi mumkin. Shamolning tezligi 13–18 m/s, ayrim mintaqalarda 20–22 m/s gacha kuchayishi mumkin. Harorat kechasi +20…+25°, kunduz kuni esa +32…+37°, Ustyurt platosida esa +27…+32° darajani tashkil etadi.

Jazirama Buxoro va Navoiyda avjiga chiqadi
Buxoro va Navoiy viloyatlarida harorat eng yuqori cho‘qqilariga chiqishi kutilmoqda. Kunduzi +42°C darajani tashkil etishi mumkin. Shamolning kuchayishi va chang-to‘zon hodisalari bu hududlarda ham qayd etilishi ehtimoldan xoli emas. Kechasi havo harorati +23…+28° orasida bo‘ladi.

Markaziy hududlarda ham jazirama
Toshkent, Sirdaryo, Jizzax va Samarqand viloyatlarida kunduzgi harorat +35…+40° darajagacha yetishi mumkin. Shamol 7–12 m/s tezlikda, ba’zi joylarda 18 m/s gacha bo‘ladi. Bu hududlarda ham havo biroz bulutli va quruq bo‘lib qoladi.

Qashqadaryo va Surxondaryoda quyosh tagida +44° issiq
Janubiy hududlar, ayniqsa Qashqadaryo va Surxondaryo viloyatlarida jazirama ayniqsa kuchli bo‘ladi. Kunduzi +44°C gacha ko‘tarilishi mumkin. Bu hududlarda ham shamol kuchayishi va changli bo‘ronlar xavfi mavjud.

Farg‘ona vodiysida momaqaldiroq ehtimoli
Andijon, Namangan va Farg‘ona viloyatlarida havo biroz bulutli, ammo ayrim tog‘ oldi hududlarida kechasi va ertalab yomg‘ir va momaqaldiroq bo‘lishi mumkin. Kunduzi harorat +35…+40° atrofida bo‘ladi. Bu viloyatlarda sharqiy shamol 5–10 m/s tezlikda yesishi kutilmoqda.

Tog‘li hududlarda salqinroq, lekin ehtiyot bo‘ling
Respublikaning tog‘li hududlarida havo salqinroq bo‘lib, kechasi +15…+20°, kunduzi esa +28…+33° darajani tashkil etadi. Shamol 13–18 m/s gacha kuchayishi mumkin. Shu bilan birga, 22 iyun kuni Toshkent, Andijon, Namangan va Farg‘ona viloyatlarining tog‘ oldi va tog‘li hududlarida sel-suv toshqin hodisalari yuzaga kelishi mumkin degan ogohlantirish berilgan. Tog‘ etaklarida yashayotgan aholiga ehtiyot bo‘lish tavsiya etiladi.

Tavsiya:
- Issiq kunlarda ochiq quyosh ostida ko‘p vaqt o‘tkazmang.
- Bolalar, keksalar va yurak-qon tomir kasalliklariga ega fuqarolarni jaziramadan ehtiyot qiling.
- Chang-to‘zon paytida niqob taqing, uyda qolishga harakat qiling.
- Har kuni kamida 2–3 litr suv iste’mol qiling. “Zamin”ni Telegramʻda oʻqing!