Majburiy ijro byurosining (MIB) Toshkent shahri, Uchtepa tumani bo‘limida erkak farzandlari uchun 2,4 mlrd so‘m miqdoridagi alimentni oldindan to‘ladi. Bu aliment miqdori bo‘yicha rekord hisoblanadi, deb xabar berdi MIB.
Qayd qilinishicha, sud buyrug‘iga asosan qarzdor Sh.J. dan undiruvchi Sh.D. foydasiga voyaga yetmagan 4 nafar farzandi ta’minoti uchun daromadlarining yarmi miqdorida aliment undirish haqidagi ijro hujjati MIB Uchtepa tumani bo‘limiga kelib tushgan.
Shuningdek, qarzdorning nomiga rasmiylashtirilgan mol-mulklarni aniqlash maqsadida vakolatli organlarga so‘rovnomalar yuborilgan hamda olingan javob xatlarga ko‘ra, qarzdorning nomiga rasmiylashtirilgan mol-mulk aniqlanmagan.
O‘tkazilgan ijro harakatlar davomida, qarzdor Sh.J. voyaga yetmagan 4 nafar farzandi ta’minoti uchun to ular voyaga yetguniga qadar to‘lanadigan aliment miqdorini hisoblab berishni so‘ragan. Hisob-kitoblardan so‘ng, 16 yillik aliment miqdori 2 mlrd 442 mln so‘m ekani aniqlangan.
Ta’kidlanishicha, qarzdor Sh.J. aliment pullarini undiruvchi Sh.D. ga uy ko‘rinishida bergan. Shundan so‘ng, undiruvchining roziligiga asosan ijro hujjati amalda tamomlangan.
Avval, nukuslik erkak 2 mlrd 270 mln so‘m alimentni oldindan to‘lab, rekord o‘rnatgan edi.
