Ko‘pchilik orasida qiziqish uyg‘otadigan savollardan biri — oyoqyalang holda mashina haydash mumkinmi? Ayrimlar bundan qulaylik topishi mumkin, ammo mutaxassislar va huquqshunoslar bu amaliyot nafaqat salomatlik, balki qonunchilik nuqtayi nazaridan ham jiddiy oqibatlarga olib kelishi mumkinligini ta’kidlashmoqda.
Yo‘l harakati qoidalarida aniq “oyoqyalang haydash taqiqlanadi” degan norma yo‘q. Biroq har bir haydovchi transport vositasini xavfsiz boshqarishi va yo‘ldagi boshqa ishtirokchilarga tahdid tug‘dirmasligi shartligi belgilab qo‘yilgan. Shu sababli, oyoqyalang haydash qonunan xavfli holat sifatida baholanishi mumkin.
Qaysi hollarda jazo qo‘llaniladi?
Agar oyoqyalang haydash natijasida yo‘l-transport hodisasi yuz bersa yoki mulkka zarar yetkazilsa, haydovchi jarimaga tortilishi yoki haydovchilik guvohnomasidan mahrum qilinishi mumkin. Odatda, yengil hodisalar uchun jarima eng kam ish haqining 1–2 baravari miqdorida belgilanadi yoki haydovchi 6 oydan 1 yilgacha mashina boshqarish huquqidan ayrilishi mumkin. Agar yetkazilgan zarar og‘ir bo‘lsa, jazo yanada kuchaytiriladi.
Nega oyoqyalang haydash xavfli?
-
Pedalni to‘liq bosish qiyinlashadi — bu haydovchi nazoratini susaytiradi.
-
Oyoqning sirpanishi ehtimoli oshadi — bu esa avariya xavfini kuchaytiradi.
-
Favqulodda vaziyatlarda reaksiya kechikishi mumkin — tormoz berish yoki tezkor harakat qilishda kechikkan holat jiddiy oqibatlarga olib keladi.
Mutasaddilar nima tavsiya qiladi?
Mashinalarni har doim qulay, xavfsiz va sirpanmaydigan poyabzal bilan haydash lozim. Bu nafaqat o‘zingizni, balki yo‘ldagi boshqa fuqarolar hayotini asrashda ham muhim ahamiyat kasb etadi.
Shu tariqa, oyoqyalang haydash qonun bilan aniq taqiqlanmagan bo‘lsa-da, uning xavfli ekani va jazoga olib kelishi mumkinligi barcha haydovchilar uchun ogohlantiruvchi misol bo‘lishi kerak.
“Zamin”ni Telegramʻda oʻqing!
